ក្រសួងការបរទេសសហរដ្ឋអាមេរិក បាននិយាយកាលពីថ្ងៃចន្ទ (១២ មករា) ថា ខ្លួនបានលុបចោលទិដ្ឋាការជាង ១០០.០០០ច្បាប់ ចាប់តាំងពីលោកប្រធានាធិបតី Donald Trump ឡើងកាន់តំណែងកាលពីឆ្នាំ២០២៥មក ដោយបង្កើតបាននូវអ្វីដែលខ្លួននិយាយថាជា «កំណត់ត្រាថ្មីមួយ» ខណៈរដ្ឋបាលរបស់លោក កំពុងបន្តដើរតាមគោលនយោបាយអន្តោប្រវេសន៍ដ៏តឹងរ៉ឹងរបស់ខ្លួន។

វិសាលភាពនៃការលុបចោលនេះ ឆ្លុះបញ្ចាំងពីការបង្ក្រាបយ៉ាងទូលំទូលាយលើអន្តោប្រវេសន៍ ដែលបានចាប់ផ្តើមនៅពេលលោក Trump វិលត្រឡប់ទៅសេតវិមានវិញកាលពីឆ្នាំមុន ដោយបាននិរទេសជនអន្តោប្រវេសន៍មួយចំនួនធំក្នុងកម្រិតមិនធ្លាប់មានពីមុនមក រួមទាំងអ្នកដែលមានទិដ្ឋាការត្រឹមត្រូវផងដែរ។ រដ្ឋបាលនេះក៏បានអនុម័តគោលនយោបាយដ៏តឹងរ៉ឹងមួយលើការផ្តល់ទិដ្ឋាការ ជាមួយនឹងការរឹតបន្តឹងការត្រួតពិនិត្យប្រព័ន្ធផ្សព្វផ្សាយសង្គម និងពង្រីកទំហំនៃការពិនិត្យលម្អិតផ្សេងទៀត។

ក្រសួងការបរទេស បាននិយាយលើបណ្ដាញសង្គម X ថា៖ «ឥឡូវនេះ ក្រសួងបានលុបចោលទិដ្ឋាការជាង ១០០.០០០ច្បាប់ រួមទាំងទិដ្ឋាការសិស្សប្រហែល ៨.០០០ច្បាប់ និងទិដ្ឋាការឯកទេសចំនួន ២.៥០០ច្បាប់ សម្រាប់បុគ្គលដែលធ្លាប់ប្រឈមមុខជាមួយអាជ្ញាធរអនុវត្តច្បាប់អាមេរិក ដោយសារសកម្មភាពឧក្រិដ្ឋកម្ម។ ក្រសួងនឹងបន្តនិរទេសពួកចោរទាំងនេះដើម្បីរក្សាសុវត្ថិភាពអាមេរិក»។

លោក Tommy Pigott អ្នកនាំពាក្យរងរបស់ក្រសួងការបរទេស បាននិយាយថា មូលហេតុចម្បងទាំង៤ សម្រាប់ការលុបចោលទិដ្ឋាការ គឺការស្នាក់នៅហួសកាលកំណត់ ការបើកបរក្រោមឥទ្ធិពលគ្រឿងស្រវឹង ការវាយប្រហារ និងចោរកម្ម ដោយបន្ថែមថា ការលុបចោលទាំងនេះជាកំណើន ១៥០% ពីឆ្នាំ២០២៤៕