អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy មានដៃគូថ្មីនៅក្នុងយុទ្ធនាការរបស់លោក ដើម្បីការពារប្រទេសគឺអង្គការ Global Citizen ជាអង្គការមិនរកប្រាក់ចំណេញអន្តរជាតិប្រយុទ្ធប្រឆាំងភាពក្រីក្រខ្លាំង។
លោក Zelenskyy និង Global Citizen បានចេញផ្សាយដំបូងនូវអ្វីដែលសង្ឃឹមថា នឹងជាការអំពាវនាវដើម្បីធ្វើសកម្មភាព សម្រាប់សមាជិករាប់លាននាក់របស់អង្គការមិនរកប្រាក់ចំណេញ ព្រមទាំងដៃគូរដ្ឋាភិបាល ក្រុមហ៊ុន និងសប្បុរសជន។ សារដំបូងរបស់ប្រធានាធិបតីអ៊ុយក្រែនបានស្វែងរកជំនួយពីពិភពលោក ក្នុងការការពារប្រទេសរបស់លោកប្រឆាំងនឹងអ្វីដែលលោកនិយាយថា ជាសកម្មភាពភេរវកម្មពីប្រទេសរុស្ស៊ី។ លោក Zelenskyy បានលើកឡើងពីការបាញ់ផ្លោងរបស់រុស្ស៊ីទៅលើទីក្រុងនានារបស់អ៊ុយក្រែន និងការបាញ់ផ្លោងទៅលើរោងចក្រថាមពលនុយក្លេអ៊ែរ។
អង្គការ Global Citizen និយាយថា អង្គការសង្ឃឹមថា ភាពជាដៃគូនេះនឹងលើកទឹកចិត្តប្រជាជនឲ្យផ្តល់ព័ត៌មានអំពីវិបត្តិមនុស្សធម៌ និងរបៀបឆ្លើយតប។ កាលពីសប្ដាហ៍មុនអង្គការសហប្រជាជាតិបាននិយាយថា ទឹកប្រាក់ចំនួន ១.៧ពាន់លានដុល្លារនឹងត្រូវការដើម្បីជួយដល់កិច្ចខិតខំផ្តល់ជំនួយ ដោយប៉ាន់ប្រមាណថា ប្រជាជន ១២លាននាក់នៅប្រទេសអ៊ុយក្រែន និងជនភៀសខ្លួន ៤លាននាក់នឹងត្រូវការជំនួយបន្ទាន់ និងការការពារនៅក្នុងរយៈពេលប៉ុន្មានខែខាងមុខនេះ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
