ចៅក្រមសហព័ន្ធម្នាក់កាលពីថ្ងៃចន្ទ ទី១២ ខែមករា បានច្រានចោលបំណងរបស់អតីតមន្ត្រីក្រសួងត្តិធម៌ជាន់ខ្ពស់ម្នាក់ក្នុងការចូលរួមជាមួយក្រុមការពារក្តីរបស់អតីតប្រធានាធិបតីប្រទេសវ៉េណេស៊ុយអេឡា លោក Nicolás Maduro ដោយចេញសេចក្តីសម្រេចថា មេធាវី លោក Bruce Fein «គ្មានមូលដ្ឋានផ្លូវច្បាប់» ដើម្បីធ្វើដូច្នេះទេ។

ចៅក្រម លោក Alvin K. Hellerstein ដំបូងឡើយបានអនុម័តពាក្យស្នើសុំរបស់ លោក Fein ដើម្បីចូលរួមក្នុងរឿងក្តីជួញដូរគ្រឿងញៀនរបស់ លោក Maduro ប៉ុន្តែបានផ្លាស់ប្តូរបំណងនេះបន្ទាប់ពីមេធាវី របស់មេដឹកនាំដែលត្រូវបានបណ្តេញចេញពីតំណែងរូបនេះ គឺលោក Barry Pollack បានជំទាស់មិនឲ្យចូលរួម។

លោក Fein ដែលជាអនុរដ្ឋមន្ត្រីក្នុងអំឡុងពេលកាន់តំណែងរបស់ប្រធានាធិបតីលោកRonald Reagan បានអះអាងនៅក្នុងឯកសារតុលាការថា «បុគ្គលដែលគួរឱ្យទុកចិត្ត» ស្ថិតក្នុងរង្វង់ខាងក្នុងឬក្នុងក្រុមគ្រួសាររបស់លោក Maduro បានស្វែងរកជំនួយពីលោក។ លោក Fein អះអាងថាលោក Maduro «បានបង្ហាញពីបំណង» សម្រាប់ជំនួយរបស់លោកក្នុងរឿងក្តីនេះ។ ប៉ុន្តែលោក Hellerstein បាននិយាយនៅក្នុងសេចក្តីបង្គាប់ថា មានតែលោក Maduro ប៉ុណ្ណោះដែលមានសិទ្ធិអំណាចក្នុងការរក្សា លោក Fein ជាមេធាវីរបស់លោក ពុំមែនជាបុគ្គលដែលមិនស្គាល់អត្តសញ្ញាណនោះទេ។ លោកបានច្រានចោលសំណើរបស់លោក Fein ដែលឲ្យចៅក្រមកោះហៅលោក Maduro មកតុលាការ ដើម្បីសួរលោកថាតើលោកចង់ឲ្យលោក Fein ត្រូវបានដាក់បន្ថែមទៅក្នុងក្រុមការពារក្តីដែរ ឬយ៉ាងណា។

លោក Hellerstein បានសរសេរថា «ប្រសិនបើលោក Maduro ចង់រក្សាលោក Fein លោកមានសមត្ថភាពធ្វើដូច្នេះ»។ «លោក Fein មិនអាចតែងតាំងខ្លួនឯងឲ្យតំណាងលោក Maduro បានទេ»។