រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា អ៊ីរ៉ង់ បានត្រៀមខ្លួនរួចរាល់ហើយសម្រាប់សង្គ្រាមជាមួយសហរដ្ឋអាមេរិក បន្ទាប់ពីលោកប្រធានាធិបតី Donald Trump បានប្រាប់អ្នកយកព័ត៌មានកាលពីយប់ថ្ងៃអាទិត្យថា លោកកំពុងពិចារណាលើសកម្មភាពយោធា បន្ទាប់ពីការតវ៉ាដ៏កម្រោលនៅប្រទេសអ៊ីរ៉ង់។

ថ្លែងក្នុងបទសម្ភាសន៍ជាមួយទូរទស្សន៍ Al Jazeera Arabic កាលពីថ្ងៃចន្ទ (១២ មករា) លោក Araghchi បាននិយាយថា អ៊ីរ៉ង់បានត្រៀមខ្លួនសម្រាប់គ្រប់ជម្រើសទាំងអស់ដែលលោក Trump ជ្រើសរើស រួមទាំងលទ្ធភាពនៃសកម្មភាពយោធាផងដែរ ដោយបន្ថែមថា “ប្រសិនបើទីក្រុងវ៉ាស៊ីនតោន ចង់សាកល្បងជម្រើសយោធាដែលខ្លួនធ្លាប់សាកពីមុនមក អ៊ីរ៉ង់ក៏ត្រៀមខ្លួនរួចហើយដែរ” ដោយសំដៅលើការទម្លាក់គ្រាប់បែករបស់អាមេរិក លើទីតាំងនុយក្លេអ៊ែរចំនួន៣ នៅអ៊ីរ៉ង់ កាលពីឆ្នាំមុន។

លោក Araghchi បានបន្តថា «អ៊ីរ៉ង់មានការត្រៀមលក្ខណៈយោធាទ្រង់ទ្រាយធំ និងទូលំទូលាយ បើប្រៀបធៀបទៅនឹងអ្វីដែលធ្លាប់បានធ្វើក្នុងអំឡុងសង្គ្រាមចុងក្រោយ ហើយសង្ឃឹមថា ទីក្រុងវ៉ាស៊ីនតោន ជ្រើសរើសជម្រើសដ៏ឈ្លាសវៃ» ខណៈក៏បើកចំហចំពោះកិច្ចសន្ទនា។

កាលពីថ្ងៃចន្ទដដែលនោះ អ្នកនាំពាក្យសេតវិមាន លោកស្រី Karoline Leavitt បាននិយាយថា ការវាយប្រហារតាមអាកាសលើអ៊ីរ៉ង់ នឹងស្ថិតក្នុងចំណោមជម្រើស «នៅលើតុ» សម្រាប់លោក Trump ប៉ុន្តែ «ការទូតតែងតែជាជម្រើសដំបូង» ទោះជាយ៉ាងនេះក្ដី អ្នកនាំពាក្យរូបនេះសង្កត់ធ្ងន់ថា លោក Trump “បានបង្ហាញថា លោកមិនខ្លាចក្នុងការប្រើប្រាស់ជម្រើសយោធានោះឡើយ”។

ភាពតានតឹងទាំងនេះកើតឡើងស្របពេលបាតុកម្មដ៏ពុះកញ្ជ្រោលនៅអ៊ីរ៉ង់ ដោយទីភ្នាក់ងារសារព័ត៌មានសកម្មជនសិទ្ធិមនុស្ស រាយការណ៍ថា មនុស្សរាប់រយនាក់បានស្លាប់ និងរាប់ពាន់នាក់ត្រូវបានចាប់ខ្លួន៕