នាយករដ្ឋមន្រ្តីអូស្រ្តាលី លោក Anthony Albanese បាននិយាយនៅថ្ងៃអង្គារ (១៣ មករា) នេះថា អូស្ត្រាលីនឹងប្រារព្ធទិវាកាន់ទុក្ខជាតិនៅថ្ងៃទី២២ ខែមករា សប្ដាហ៍ក្រោយនេះ សម្រាប់មនុស្ស ១៥នាក់ ដែលបានស្លាប់នៅក្នុងការបាញ់ប្រហារសម្លាប់រង្គាលនៅឆ្នេរ Bondi នៃទីក្រុងស៊ីដនី។

លោក Albanese បានប្រាប់អ្នកយកព័ត៌មានថា ពិធីនេះនឹងប្រារព្ធក្រោមប្រធានបទថា៖ «ពន្លឺនឹងឈ្នះ» ដោយទង់ជាតិនឹងត្រូវបង្ហូតពាក់កណ្តាលដង ទូទាំងប្រទេសអូស្ត្រាលី។

គួររម្លឹកថា នៅថ្ងៃទី១៤ ខែធ្នូ ឆ្នាំមុន ខ្មាន់កាំភ្លើងពីរនាក់ ដែលជាឪពុកនិងកូនប្រុស ត្រូវចោទប្រកាន់ថា បានកំណត់គោលដៅលើពិធីបុណ្យ Hanukkah របស់ជនជាតិជ្វីហ្វ នៅឆ្នេរដ៏ Bondi ល្បីល្បាញ ដែលជាការបាញ់ប្រហារដ៏ធំបំផុតរបស់អូស្រ្តាលី ក្នុងរយៈពេល ៣០ឆ្នាំ។ ឧប្បត្តិហេតុនេះបានបង្កឱ្យមានចំណាត់ការទប់ស្កាត់ការប្រឆាំងជនជាតិជ្វីហ្វ និងការប្ដេជ្ញារឹតបន្តឹងច្បាប់អាវុធ។

នគរបាលនិយាយថា ខ្មាន់កាំភ្លើងទាំងពីរនាក់នោះ ត្រូវបានបំផុសគំនិតដោយក្រុមសកម្មប្រយុទ្ធ រដ្ឋអ៊ិស្លាម។ កាលពីសប្តាហ៍មុន លោក Albanese បានប្រកាសបើកការស៊ើបអង្កេតរបស់គណៈកម្មការ ដែលមានអំណាចខ្ពស់បំផុតមួយរបស់ប្រទេស ហើយរបាយការណ៍នៃការរកឃើញ ត្រូវបានរំពឹងទុកនៅខែធ្នូ ឆ្នាំ២០២៦ នេះ៕