យោងតាមការជូនដំណឹងរបស់កងទ័ពជើងទឹកកាលពីថ្ងៃចន្ទ ទី១២ ខែមករា បានឲ្យដឹងថា កងទ័ពជើងទឹកប្រទេសម៉ិកស៊ិក បានរុះរើមន្ទីរពិសោធន៍គ្រឿងញៀនលួចលាក់នៅទីតាំងផ្សេងៗគ្នានៅក្នុងរដ្ឋចំនួនបី ដោយរឹបអូសបានគ្រឿងញៀន និងសារធាតុផ្សំគីមីផ្សេងៗគ្នា។ មន្ទីរពិសោធន៍គ្រឿងញៀនទាំងនោះ ត្រូវបានកំណត់នៅក្នុងរដ្ឋ Durango រដ្ឋSinaloa និងរដ្ឋ Michoacan។

កងទ័ពជើងទឹកបានចែករំលែកវីដេអូ និងរូបថតនៃប្រតិបត្តិការនៅរដ្ឋ Michoacan និង តំបន់ព្រំដែនរវាង រដ្ឋDurango និងរដ្ឋ Sinaloa។ នៅរដ្ឋ Durango មន្ត្រីបានរឹបអូសសារធាតុផ្សំគីមីចំនួន១.១៥០លីត្រ និង៦៩៥គីឡូក្រាមនិងសម្ភារៈផ្សេងទៀតដែលប្រើប្រាស់សម្រាប់ផលិតគ្រឿងញៀនសំយោគ នេះបើយោងតាមសេចក្តីថ្លែងការណ៍របស់កងទ័ពជើងទឹក។

នៅរដ្ឋ Sinaloa គ្រឿងញៀនប្រហែល៧៥០គីឡូក្រាមត្រូវបានរឹបអូស។ ហើយនៅរដ្ឋ Michoacan សារធាតុផ្សំគីមីចំនួន៩.៧០០លីត្រ និង៥០០គីឡូក្រាមត្រូវបានរកឃើញ។ ប្រតិបត្តិការនេះ ត្រូវបានប្រកាសបន្ទាប់ពីប្រធានាធិបតីសហរដ្ឋអាមេរិក លោក Donald Trump កាលពីសប្តាហ៍មុន នៅក្នុងបទសម្ភាសន៍ជាមួយសារព័ត៌មាន Fox News បាននិយាយថា ក្រុមជួញដូរគ្រឿងញៀនកំពុងគ្រប់គ្រងប្រទេសម៉ិកស៊ិក និងបានបង្ហាញថាសហរដ្ឋអាមេរិក អាចវាយប្រហារគោលដៅដីគោកដើម្បីប្រយុទ្ធប្រឆាំងពួកគេ។

បន្ទាប់ពីការសន្ទនាតាមទូរស័ព្ទជាមួយលោក Trump កាលពីថ្ងៃចន្ទ ប្រធានាធិបតីម៉ិកស៊ិក លោកស្រី ក្លៅឌៀ សេនបោម(Claudia Sheinbaum) បានច្រានចោលការធ្វើអន្តរាគមន៍ណាមួយដោយយោធា។