អឺរ៉ុប៖ សហភាពអឺរ៉ុបកាលពីថ្ងៃអង្គារបានបង្ហាញផែនការថ្មីមួយ ដើម្បីកាត់បន្ថយការពឹងផ្អែករបស់ខ្លួនលើថាមពលរបស់ប្រទេសរុស្ស៊ី ស្របពេលមានការវាយប្រហាររបស់ទីក្រុង Moscow លើអ៊ុយក្រែន តម្លៃខ្ពស់កប់ពពក និងការដាក់ទណ្ឌកម្មធ្ងន់ធ្ងរលើបម្រាមនាំចូលប្រេងឆៅពីរុស្ស៊ី។
គណៈកម្មការអឺរ៉ុបដែលជាស្ថាប័នប្រតិបត្តិរបស់សហភាពអឺរ៉ុប ចង់បញ្ឈប់ការទិញឥន្ធនៈហ្វូស៊ីលពីរុស្ស៊ីមុនឆ្នាំ២០៣០។ ហើយឥឡូវនេះខ្លួនបានបង្ហាញការប្ដេជ្ញាថ្មី ក្នុងការកាត់បន្ថយការទិញឧស្ម័នពីរុស្ស៊ីចំនួន ២ភាគ៣ នៅមុនដំណាច់ឆ្នាំនេះ។ គណៈកម្មការខាងលើបាននិយាយកាលពីថ្ងៃអង្គារនៅក្នុងសេចក្ដីថ្លែងការណ៍មួយថា ចំណាត់ការនេះនឹងសម្រេចបានដោយការបង្វែរអ្នកផ្គត់ផ្គង់របស់ខ្លួន បង្កើនការផលិតអ៊ីដ្រូសែនកកើតឡើងវិញ និងការកែលម្អប្រសិទ្ធភាពថាមពលនៅក្នុងប្រទេស។
ប្លុកដែលមានសមាជិក ២៧ប្រទេសត្រូវបានគេរិះគន់យ៉ាងខ្លាំង ចំពោះការពឹងផ្អែកខ្លាំងពេកលើរុស្ស៊ីសម្រាប់ថាមពល ជាពិសេសបន្ទាប់ពីការវាយប្រហារដោយគ្មានហេតុផលរបស់ទីក្រុង Moscow ទៅលើអ៊ុយក្រែន។ យោងតាមទីភ្នាក់ងារថាមពលអន្តរជាតិបានឱ្យដឹងថា នៅឆ្នាំ២០២១ សហភាពអឺរ៉ុបបាននាំចូលឧស្ម័នរបស់ខ្លួនពីប្រទេសរុស្ស៊ីប្រហែល ៤៥%។ នៅក្នុងឆ្នាំ២០២០ ការនាំចូលប្រេងរបស់រុស្ស៊ីមានចំនួនប្រហែល ២៥% នៃការទិញប្រេងឆៅរបស់ប្លុកនេះ នេះបើយោងតាមការិយាល័យស្ថិតិក្នុងតំបន់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
