ប្រធានកម្មវិធីស្បៀងអាហារពិភពលោក (WFP) របស់អង្គការសហប្រជាជាតិ លោកស្រី Cindy McCain កាលពីថ្ងៃចន្ទ (១២ មករា) បានអំពាវនាវដល់បណ្ដាមេដឹកនាំពិភពលោក ឱ្យចាត់វិធានការជាបន្ទាន់ ដើម្បីទប់ស្កាត់គ្រោះទុរ្ភិក្សដែលបង្កឡើងដោយមនុស្ស ខណៈភាពអត់ឃ្លានជាសកល ឈានដល់កម្រិតគួរឱ្យព្រួយបារម្ភ។

យោងតាមរបាយការណ៍ ចក្ខុវិស័យសកលឆ្នាំ២០២៦ របស់ WFP បានឱ្យដឹងថា មនុស្ស ៣១៨លាននាក់ នៅទូទាំងពិភពលោក ប្រឈមនឹងកម្រិតវិបត្តិនៃភាពអត់ឃ្លាន ឬអាក្រក់ជាងនេះ ដោយមានមនុស្សរាប់សែននាក់កំពុងជួបប្រទះនឹងស្ថានភាពដូចគ្រោះទុរ្ភិក្សរួចទៅហើយ។ ប្រព័ន្ធព្រមានជាមុនរបស់ទីភ្នាក់ងារនេះ លើកឡើងពីជម្លោះដ៏ហិង្សា អាកាសធាតុអាក្រក់ និងការធ្លាក់ចុះសេដ្ឋកិច្ច ថាជាកត្តាជំរុញដ៏សំខាន់នៃអសន្តិសុខស្បៀងអាហារ ដែលកំពុងកើនឡើងនៅទូទាំងពិភពលោក។

លោកស្រី McCain នាយិកាប្រតិបត្តិនៃកម្មវិធី WFP បាននិយាយក្នុងសេចក្តីថ្លែងការណ៍មួយថា «ទើបតែពីរសប្តាហ៍ប៉ុណ្ណោះ ចូលទៅក្នុងឆ្នាំ២០២៦នេះ ពិភពលោកកំពុងប្រឈមនឹងហានិភ័យនៃវិបត្តិអត់ឃ្លានសកលដ៏គ្រោះថ្នាក់ និងកាន់តែធ្ងន់ធ្ងរឡើងទៅហើយ»។

នាយិការូបនេះបានបន្ថែមថា «WFP មិនអាចបញ្ចប់ភាពអត់ឃ្លានដ៏អាក្រក់នេះដោយខ្លួនឯងបានទេ» ដោយអំពាវនាវដល់មេដឹកនាំពិភពលោក «ឱ្យចូលអន្តរាគមន៍អំឡុងពេលមានវិបត្តិមនុស្សធម៌ លុបបំបាត់គ្រោះទុរ្ភិក្សដែលបង្កឡើងដោយមនុស្សលើពិភពលោក ហើយអ្វីដែលសំខាន់បំផុត គឺត្រូវបញ្ចប់ជម្លោះដ៏បំផ្លិចបំផ្លាញ ដែលជំរុញឱ្យមានភាពអត់ឃ្លាន និងភាពអស់សង្ឃឹមទាំងនោះ»៕