ប្រធានាធិបតីបណ្ដោះអាសន្ន លោកស្រី Delcy Rodriguez បាននិយាយថា ប្រទេសវ៉េណេស៊ុយអេឡា ដែលជាប្រទេសមានអធិបតេយ្យភាព និងឯករាជ្យ ត្រូវបានគ្រប់គ្រងដោយរដ្ឋាភិបាល និងប្រជាជនផ្ទាល់ខ្លួន។ លោកស្រីបានប្រាប់ទូរទស្សន៍ Venezolana de Television ថា៖«រដ្ឋាភិបាលវ៉េណេស៊ុយអេឡាគ្រប់គ្រងប្រទេសនេះ រួមគ្នាជាមួយប្រជាជនដែលមានការរៀបចំ» ដោយបន្ថែមថា ប្រទេសនេះបានតែងតាំងប្រធានាធិបតីបណ្ដោះអាសន្ន ខណៈពេលដែល«លោកប្រធានាធិបតី នីកូឡាស ម៉ាឌូរ៉ូ កំពុងត្រូវបានសហរដ្ឋអាមេរិកចាប់ជាចំណាប់ខ្មាំង»។

លោកស្រីបានសង្កត់ធ្ងន់ថា៖«យើងសូមបញ្ជាក់ជាថ្មីអំពីអធិបតេយ្យភាព និងឯករាជ្យភាពរបស់ប្រទេសនេះ និងការពារសិទ្ធិរបស់ប្រទេសវ៉េណេស៊ុយអេឡា ក្នុងទំនាក់ទំនងជាមួយអន្តរជាតិ»។

កាលពីថ្ងៃទី ០៣ ខែមករា ប្រធានាធិបតីអាមេរិក ដូណាល់ ត្រាំ បានប្រកាសពីប្រតិបត្តិការយោធាមួយ នៅទីក្រុងការ៉ាកាស ដែលនាំឲ្យមានការចាប់ខ្លួនលោក ម៉ាឌូរ៉ូ និងភរិយារបស់ខ្លួន លោកស្រី Cilia Flores ដោយកងកម្លាំងអាមេរិក។ នៅថ្ងៃទី 0៥ ខែមករា គូស្វាមីភរិយានេះ បានបង្ហាញខ្លួននៅចំពោះមុខតុលាការសហព័ន្ធអាមេរិកសម្រាប់សង្កាត់ភាគខាងត្បូងនៃទីក្រុងញូវយ៉ក ជាកន្លែងដែលពួកគេប្រឈមមុខនឹងការចោទប្រកាន់ពីបទជាប់ពាក់ព័ន្ធនឹងការជួញដូរគ្រឿងញៀន។ ពួកគេទាំងពីរ បានអះអាងថា មិនមានទោសទេ។ លោកស្រីអនុប្រធានាធិបតី Delcy Rodriguez បានស្បថចូលកាន់តំណែង ជាប្រធានាធិបតីបណ្ដោះអាសន្នរបស់វ៉េណេស៊ុយអេឡា នៅថ្ងៃទី ០៦ ខែមករា។

ទន្ទឹមនឹងនេះ លោក ត្រាំ បាននិយាយថា ទីក្រុងវ៉ាស៊ីនតោន នឹង «គ្រប់គ្រង» ប្រទេសវ៉េណេស៊ុយអេឡាជាបណ្ដោះអាសន្ន។ លើសពីនេះ មេដឹកនាំអាមេរិករូបនេះ បានសម្តែងទំនុកចិត្តថា ទីក្រុងវ៉ាស៊ីនតោន នឹងធ្វើឲ្យទីក្រុងការ៉ាកាសផ្តល់សំណងដល់ក្រុមហ៊ុនប្រេងអាមេរិកចំពោះការខូចខាតដែលបានកើតឡើង៕