រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា ទីក្រុងតេអេរ៉ង់បានត្រៀមខ្លួនរួចជាស្រេច ដើម្បីវិលត្រឡប់ទៅរកការចរចាអំពីកម្មវិធីនុយក្លេអ៊ែររបស់ខ្លួន ប្រសិនបើទីក្រុងវ៉ាស៊ីនតោនឈប់ព្យាយាមកំណត់លក្ខខណ្ឌដល់សាធារណរដ្ឋនេះ ហើយឈប់ការគំរាមកំហែង។  

លោកបានប្រាប់ទូរទស្សន៍ Al Jazeera ថា៖«យើងត្រៀមខ្លួនរួចរាល់ហើយ ដើម្បីចរចាអំពីកម្មវិធីនុយក្លេ  អ៊ែរ ដោយមានលក្ខខណ្ឌថា ការពិភាក្សានេះ នឹងដំណើរការដោយគ្មានការគំរាមកំហែង និងការបង្គាប់បញ្ជា»។

ទោះជាយ៉ាងណាក៏ដោយ លោកបានព្រមានថា ទីក្រុងតេអេរ៉ង់បានត្រៀមខ្លួនរួចជាស្រេចសម្រាប់សេណារីយោទាំងអស់។ លោក Araghchi បាននិយាយថា៖«ប្រសិនបើទីក្រុងវ៉ាស៊ីនតោនជ្រើសរើសយកសេណារីយោយោធាដែលត្រូវបានប្រើប្រាស់ពីមុនមក យើងត្រៀមខ្លួនរួចជាស្រេចសម្រាប់រឿងនោះ» ដោយបន្ថែមថា ប្រទេសរបស់លោក បានត្រៀមខ្លួនរួចជាស្រេចសម្រាប់ការប្រឈមមុខដាក់គ្នាដោយអាវុធជាងកាលពីខែមិថុនា ឆ្នាំ ២០២៥។ លោកបានសង្កត់ធ្ងន់ថា៖«យើងត្រៀមខ្លួនរួចជាស្រេចសម្រាប់ការវិវត្តណាមួយ ហើយសង្ឃឹមថា ទីក្រុងវ៉ាស៊ីនតោននឹងធ្វើការជ្រើសរើសដ៏ឈ្លាសវៃ»។

នៅថ្ងៃទី ២៩ ខែធ្នូ ឆ្នាំ ២០២៥ ពាណិជ្ជករបានចាប់ផ្តើមតវ៉ា នៅទីក្រុងតេអេរ៉ង់ ជុំវិញការធ្លាក់ចុះយ៉ាងខ្លាំងនៃតម្លៃប្រាក់រៀលអ៊ីរ៉ង់។ នៅថ្ងៃទី ៣០ ខែធ្នូ និស្សិតសាកលវិទ្យាល័យ បានចូលរួមនឹងភាពចលាចលនេះ ដែលបានបង្កឲ្យមានស្ថានភាពដ៏បំផ្លិចបំផ្លាញដល់ទីក្រុងធំៗភាគច្រើន។ 

ប្រធានាធិបតីអាមេរិកលោក ដូណាល់ ត្រាំ បាននិយាយនាពេលថ្មីនេះថា សហរដ្ឋអាមេរិកកំពុងពិចារណាប្រើប្រាស់កម្លាំង ដើម្បីបង្ក្រាបភាពចលាចល នៅក្នុងប្រទេសអ៊ីរ៉ង់។ ជម្រើសនៃការឆ្លើយតបចំពោះការវិវត្ត នៅក្នុងប្រទេសអ៊ីរ៉ង់ រួមទាំងការវាយប្រហារដែលអាចកើតមាន ត្រូវបានគេរំពឹងថា នឹងត្រូវបានបង្ហាញដល់លោក នៅថ្ងៃទី ១៣ ខែមករានេះ៕