ម៉ូតូទឹក៖ កីឡាករម៉ូតូទឹកដ៏ឆ្នើមរបស់កម្ពុជា សាលី អ៊ូមើត បានអះអាងថា ខ្លួននឹងចូលនិវត្តន៍ពីក្រុមជម្រើសជាតិម៉ូតូទឹកកម្ពុជា ក្រោយចប់ការប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា។ ម្ចាស់មេដាយមាស និងសំរឹទ្ធកីឡាអាស៊ីលើកទី១៨ រូបនេះបានបញ្ជាក់ថា ដោយសារខ្លួនមានវ័យកាន់តែច្រើន គួបផ្សំការចង់ផ្ដល់ឱកាសឲ្យកីឡាករជំនាន់ក្រោយបានបង្ហាញសមត្ថភាពផង រូបគេនឹងចូលនិវត្តន៍ពីជម្រើសជាតិ បន្ទាប់ពីចប់ការប្រកួតស៊ីហ្គេមនៅកម្ពុជា ទោះបីដណ្ដើមបានមេដាយ ឬអត់ក៏ដោយ។
ប៉ុន្ដែយ៉ាងណាក្ដីមុនចូលនិវត្តន៍ពីជម្រើសជាតិ អ៊ូមើត បានប្ដេជ្ញានឹងខំប្រឹងឲ្យអស់ពីលទ្ធភាពដើម្បីបង្កើនកំណត់ត្រាថ្មីជូនជាតិមួយទៀតគឺការប្រជែងមេដាយមាសស៊ីហ្គេមឲ្យខានតែបាន បន្ទាប់ពីរូបគេដណ្ដើមបានមេដាយមាសកីឡាអាស៊ី លើកដំបូងនៅប្រទេសឥណ្ឌូនេស៊ីកាលពីឆ្នាំ២០១៨។ គួរដឹងថា សាលី អ៊ូមើត បានកើតនៅថ្ងៃទី០៧ ខែកុម្ភៈ ឆ្នាំ១៩៩២ នៅស្រុកមេមត់ ខេត្ដត្បូងឃ្មុំ។ ជាង ១០ឆ្នាំចុងក្រោយនេះ អ៊ូមើត បានសាងភាពល្បីល្បាញលើឆាកអន្ដរជាតិ ជាមួយអាជីពកីឡាម៉ូតូទឹក ក្រោយដណ្ដើមបានមេដាយស្ទើររាប់ភ្លេចក្នុងកម្មវិធីធំៗជាច្រើន ទាំងថ្នាក់តំបន់ និងពិភពលោក ពិសេសឆ្នាំ២០១៨ ជាឆ្នាំប្រវត្តិសាស្ដ្រដែលគេបានធ្វើឲ្យប្រជាពលរដ្ឋទូទាំងប្រទេស និងឆាកអន្ដរជាតិ កោតស្ញប់ស្ញែង បន្ទាប់ពីគេដណ្ដើមបានមេដាយមាសកីឡាអាស៊ី នៅប្រទេសឥណ្ឌូនេស៊ី។
ថ្មីៗនេះ អ៊ូមើត ទើបបានត្រឡប់ចូលហ្វឹកហាត់វិញ បន្ទាប់ពីធ្វើការវះកាត់ឆ្អឹងខ្នង់ដែលប្រេះ ក្រោយការប៉ះទង្គិចអំឡុងពេលហ្វឹកហាត់ ហើយរូបគេបានប្ដេជ្ញានឹងខិតខំប្រឹងប្រែងហ្វឹកហាត់បន្ថែមទៀត ដើម្បីត្រៀមការប្រកួតអន្ដរជាតិនានា រហូតដល់ស៊ីហ្គេមឆ្នាំ២០២៣ នៅកម្ពុជា ដោយរូបគេរំពឹង និងប្ដេជ្ញាដណ្ដើមមេដាយមាសជូនជាតិជាថ្មី មុនខ្លួនចូលនិវត្តន៍ពីជម្រើសជាតិផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
