ប្រទេសចិនបានសម្តែងការប្រឆាំង ចំពោះការប្រើប្រាស់កម្លាំង នៅតំបន់មជ្ឈិមបូព៌ា ខណៈដែលប្រធានាធិបតីអាមេរិក លោក Donald Trump បានគំរាមវាយប្រហារអ៊ីរ៉ង់ ដោយសារការតវ៉ាមានកាន់តែខ្លាំងឡើងៗ នៅទីនោះ។

កាលពីថ្ងៃចន្ទ (ទី១២ ខែមករា ឆ្នាំ២០២៦) អ្នកនាំពាក្យក្រសួងការបរទេសចិន លោកស្រី Mao Ning បាននិយាយថា ទីក្រុងប៉េកាំងសង្ឃឹមថា រដ្ឋាភិបាលអ៊ីរ៉ង់ និងប្រជាជនរបស់ខ្លួន នឹងអាចជម្នះលើ «ការលំបាកបច្ចុប្បន្ន« និងរក្សាបាននូវស្ថិរភាពនៅក្នុងប្រទេស។

នៅក្នុងសន្និសីទសារព័ត៌មានមួយ ដោយឆ្លើយតបទៅនឹងសំណួរ ពាក់ព័ន្ធនឹងការគំរាមកំហែងរបស់លោក Trump ក្នុងការវាយប្រហារអ៊ីរ៉ង់ លោកស្រីបានថា៖ «យើងតែងតែប្រឆាំងនឹងការជ្រៀតជ្រែកក្នុងកិច្ចការផ្ទៃក្នុងរបស់ប្រទេសដទៃទៀត។ អធិបតេយ្យភាព និងបូរណភាពទឹកដីរបស់ប្រទេសទាំងអស់ គួរតែត្រូវបានគោរព ហើយ (យើង) ប្រឆាំងនឹងការប្រើប្រាស់ ឬការគំរាមកំហែង ពាក់ព័ន្ធនឹងកម្លាំង ក្នុងទំនាក់ទំនងអន្តរជាតិ។ យើងអំពាវនាវឲ្យភាគីនានាមាននូវវិធានការតាមរបៀបដែលអំណោយផលដល់សន្តិភាព និងស្ថិរភាព នៅតំបន់មជ្ឈិមបូព៌ា»។

គួរបញ្ជាក់ថា ការតវ៉ា នៅក្នុងប្រទេសអ៊ីរ៉ង់ បានចាប់ផ្តើមកាលពីខែធ្នូឆ្នាំមុន ដោយសារតែអតិផរណាកើនឡើង និងតម្លៃម្ហូបអាហារឡើងខ្ពស់ ប៉ុន្តែបានរីករាលដាលយ៉ាងឆាប់រហ័សប្រែទៅជាបាតុកម្មប្រឆាំងរដ្ឋាភិបាលយ៉ាងទូលំទូលាយ។ ហើយបើយោងតាមក្រុមសិទ្ធិមនុស្ស បានឲ្យដឹងថា រដ្ឋាភិបាលអ៊ីរ៉ង់បានឆ្លើយតបដោយការបង្ក្រាបដោយហិង្សា ដែលបានបណ្តាលឲ្យមនុស្សជាង ៥០០នាក់យ៉ាងតិចបាត់បង់ជីវិត។

កាលពីថ្ងៃអាទិត្យចុងសប្ដាហ៍កន្លងមក លោក Trump បានបង្ហាញថា លោកកំពុងពិចារណាលើជម្រើសឆ្លើយតបជាច្រើន ចំពោះភាពចលាចលដែលកំពុងកើនឡើងនេះ ដោយបានបញ្ជាក់ថា វាហាក់ដូចជាអ៊ីរ៉ង់បានឆ្លងកាត់ខ្សែបន្ទាត់ក្រហមដែលលោកធ្លាប់បាននិយាយពីមុន ជុំវិញការសម្លាប់បាតុករ៕