កាលពីល្ងាចថ្ងៃចន្ទ (ទី១២ ខែមករា ឆ្នាំ២០២៦) ចិនបានបញ្ជាក់ថា ខ្លួនប្រឆាំងនឹងការដាក់ «ទណ្ឌកម្មជាឯកតោភាគីដោយខុសច្បាប់ និងការមានយុត្តាធិការហួសពីដែនកំណត់» បន្ទាប់ពីប្រធានាធិបតីអាមេរិក លោក Donald Trump បានបង្ហោះនៅលើបណ្ដាញសង្គមថា ប្រទេសដែលធ្វើអាជីវកម្មជាមួយអ៊ីរ៉ង់ នឹងប្រឈមជាមួយអត្រាពន្ធ ២៥ភាគរយ លើពាណិជ្ជកម្ម នៅសហរដ្ឋអាមេរិក។

អ្នកនាំពាក្យស្ថានទូតចិន ប្រចាំទីក្រុងវ៉ាស៊ីនតោន សហរដ្ឋអាមេរិក បានលើកឡើងថា៖ «ជំហររបស់ប្រទេសចិនក្នុងការប្រឆាំងនឹងការដាក់ពន្ធមិនគិតគូរកំណត់ឲ្យបានច្បាស់លាស់ គឺមិនផ្លាស់ប្ដូរ និងច្បាស់លាស់ណាស់។ សង្គ្រាមពន្ធ និងសង្គ្រាមពាណិជ្ជកម្ម គ្មានអ្នកណាជាអ្នកឈ្នះនោះទេ ហើយការសម្លុតកំហែង និងការដាក់សម្ពាធ មិនអាចដោះស្រាយបញ្ហាបានឡើយ»។

អ្នកនាំពាក្យរូបនេះ បានសង្កត់ធ្ងន់ថា៖ «ប្រទេសចិនប្រឆាំងយ៉ាងម៉ឺងម៉ាត់ ចំពោះការដាក់ចេញនូវទណ្ឌកម្មជាឯកតោភាគីដោយខុសច្បាប់ និងការមានយុត្តាធិការហួសពីដែនកំណត់ ហើយនឹងចាត់វិធានការចាំបាច់ទាំងអស់ ដើម្បីការពារសិទ្ធិ និងផលប្រយោជន៍ស្របច្បាប់របស់ខ្លួន»។

គួរបញ្ជាក់ថា លោក Trump បានប្រកាសពីការដាក់អត្រាពន្ធ ២៥ភាគរយលើប្រទេសណាមួយដែលធ្វើអាជីវកម្មជាមួយអ៊ីរ៉ង់ ជាចំណាត់មួយដែលអាចប៉ះពាល់យ៉ាងខ្លាំងដល់ដៃគូពាណិជ្ជកម្មសំខាន់ៗរបស់ទីក្រុងតេអេរ៉ង់ រួមមានឥណ្ឌា ចិន និងអារ៉ាប់រួម។

ការប្រកាសនេះក៏អាចមានផលប៉ះពាល់ដល់ប្រទេសឥណ្ឌាផងដែរ ដែលបានក្លាយជាដៃគូពាណិជ្ជកម្មធំជាងគេទាំង ៥ របស់អ៊ីរ៉ង់ ក្នុងរយៈពេលប៉ុន្មានឆ្នាំចុងក្រោយនេះ។ សហរដ្ឋអាមេរិកបានដាក់អត្រាពន្ធរហូតដល់ ៥០ភាគរយលើទំនិញឥណ្ឌារួចហើយ ពោលគឺស្ថិតក្នុងចំណោមប្រទេសដែលមានអត្រាខ្ពស់បំផុតរបស់ពិភពលោក ដែលរួមមានទាំងពន្ធគយ ២៥ភាគរយ ទាក់ទងនឹងការទិញថាមពលរុស្ស៊ីរបស់ទីក្រុងញ៉ូវដេលី៕