បាល់ទះ៖ សហព័ន្ធកីឡាបាល់ទះកម្ពុជាកាលពីថ្ងៃទី០៨ ខែមីនា ឆ្នាំ២០២២ បានរៀបចំការប្រកួតកីឡាបាល់ទះនារី ដណ្ដើមពានរង្វាន់អបអរសាទរខួបលើកទី១១១ នៃទិវានារីអន្ដរជាតិ ៨មីនា នៅកីឡដ្ឋានព្រីនស៍ ដោយមានក្រុមបាល់ទះនារី ៤ក្រុមចូលរួមរួមមានក្រុមន្ទីអប់រំយុវជន និងកីឡាខេត្តព្រៃវែង, ខេត្តពោធិ៍សាត់ ខេត្តកំពង់ធំ និងក្រុមបាល់ទះនារីនៃវិទ្យាល័យ ហ៊ុន សែន ខ្ចៅ តំណាងខេត្តកំពង់ចាម។
ព្រឹត្តិការណ៍នេះរៀបចំឡើងក្នុងគោលបំណងសំខាន់ៗពីរ ទី១-ដើម្បីអបអរសាទរថ្ងៃទិវានារីអន្ដរជាតិ ៨មីនា ឆ្នាំ២០២២ និងទី២-ដើម្បីផ្ដល់ឱកាសឲ្យកីឡាការិនីបាល់ទះកម្ពុជាបានបង្ហាញនូវសមត្ថភាព និងកម្ដៅសាច់ដុំក្នុងន័យលើកកម្ពស់កម្រតិសមត្ថភាព និងបច្ចេកទេសឲ្យកាន់តែប្រសើរឡើង សម្រាប់ត្រៀមចូលរួមការប្រកួតសំខាន់ៗនាពេលខាងមុខ ដោយរៀបចំដោយសហព័ន្ធកីឡាបាល់ទះកម្ពុជា។ ចំពោះលទ្ធផលនៃការប្រកួតសម្រាប់វគ្គជម្រុះខេត្តពោធិ៍សាត់ បានយកឈ្នះខេត្តព្រៃវែង ៣-០ សិត ស្របពេលខេត្តកំពង់ធំបានយកឈ្នះខេត្តកំពង់ចាម ៣-២សិត មុនដឹកនាំគ្នាឡើងវគ្គផ្ដាច់ព្រ័ត្រ ខណៈជើងឯកបានទៅក្រុមមន្ទីរអប់រំ យុវជន និងកីឡាខេត្តពោធិ៍សាត់ ក្រោយបន្ដយកឈ្នះខេត្តកំពង់ធំដោយលទ្ធផល ៣-២សិត។
រីឯជំនួបដណ្ដើមចំណាត់ថ្នាក់លេខ៣ ខេត្តព្រៃវែងបានវាយបកឈ្នះខេត្តកំពង់ចាម ៣-២។ សម្រាប់ប្រាក់រង្វាន់ក្រុមដណ្ដើមបានជ័យលាភី ក្រោយឆ្លងកាត់ការប្រកួត ១ថ្ងៃពេញនេះ ក្រុមជើងឯកខេត្តពោធិ៍សាត់ទទួលបានប្រាក់រង្វាន់ ២លានរៀល ខណៈក្រុមជើងឯករងខេត្តកំពង់ធំទទួលបានប្រាក់រង្វាន់ ១លាន ២សែនរៀល។ រីឯក្រុមលេខ៣ ខេត្តព្រៃវែងទទួលបាន ៨សែនរៀល និងក្រុមលេខ៤ ខេត្តកំពង់ចាមទទួលបាន ៤សែនរៀល៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
