មន្ត្រីសេតវិមានម្នាក់ កាលពីថ្ងៃចន្ទ (ទី១២ ខែមករា ឆ្នាំ២០២៦) បានបញ្ជាក់ថា ឥស្សរជនប្រឆាំងរបស់វ៉េណេស៊ុយអេឡា លោកស្រី Maria Corina Machado នឹងជួបជាមួយប្រធានាធិបតី លោក Donald Trump នៅថ្ងៃព្រហស្បតិ៍សប្ដាហ៍នេះ។

ជំនួបកំពូលនេះ នឹងកើតឡើងបន្ទាប់ពីប្រតិបត្តិការយោធារបស់សហរដ្ឋអាមេរិក ដែលបញ្ជាដោយលោក Trump នាំឲ្យមានការចាប់ខ្លួនប្រធានាធិបតីវ៉េណេស៊ុយអេឡា លោក Nicolas Maduro និងភរិយារបស់លោក គឺលោកស្រី Cilia Flores កាលពីថ្ងៃទី៣ ខែមករា។

ក្រោយមកលោក Maduro និងលោកស្រី Flores ត្រូវបាននាំខ្លួនចេញពីប្រទេសវ៉េណេស៊ុយអេឡា ហើយបន្ទាប់មកទៅកាន់សហរដ្ឋអាមេរិក ជាកន្លែងដែលអ្នកទាំង២ កំពុងត្រូវបានកាត់ទោស ជុំវិញការចោទប្រកាន់ពីបទកាន់កាប់ និងប្រើប្រាស់អាវុធ។

រហូតមកដល់ពេលនេះ លោក Trump បានបដិសេធមិនគាំទ្រលោកស្រី Machado ឲ្យដឹកនាំវ៉េណេស៊ុយអេឡានោះឡើយ ដោយផ្ដល់ហេតុផលថា លោកស្រីមិនមានការគាំទ្រ និងការគោរពពីប្រជាជនវេណេស៊ុយអេឡា។

ភ្លាមៗបន្ទាប់ពីមានការចាប់ខ្លួនលោក Maduro លោក Trump បាននិយាយថា៖ «ខ្ញុំគិតថា វាគឺជារឿងពិបាកណាស់ ដើម្បីឲ្យលោកស្រីក្លាយជាមេដឹកនាំ។ លោកស្រីមិនមានការគាំទ្រនៅក្នុង ឬការគោរព នៅក្នុងប្រទេសនេះទេ។ លោកស្រីគឺជាស្ត្រីដ៏ល្អម្នាក់ ប៉ុន្តែលោកស្រីមិនទទួលបានការគោរពនោះទេ»។

លោកស្រី Machado បាននិយាយកាលពីសប្តាហ៍មុនថា លោកស្រីចង់ចែករំលែកជាមួយ ឬប្រគល់ពានរង្វាន់ណូបែលសន្តិភាពរបស់លោកស្រីទៅឲ្យលោក Trump ប៉ុន្តែវិទ្យាស្ថានណូបែលន័រវ៉ែស បញ្ជាក់ថា ពានរង្វាន់នេះមិនអាចផ្ទេរបានទេ៕