ប្រជាពលរដ្ឋរស់នៅក្នុងភូមិ Ashrafiyah ស្ថិតក្នុងទីក្រុង Aleppo ប្រទេសស៊ីរី ដែលបានរត់ភៀសខ្លួនទៅកាន់ទីក្រុង Afrin ដោយសារការប៉ះទង្គិចគ្នានោះ ចាប់ផ្តើមវិលត្រឡប់ទៅកាន់ផ្ទះសម្បែងរបស់ពួកគេវិញហើយកាលពីថ្ងៃចន្ទ ក្រោយជម្លោះរយៈពេល ១សប្តាហ៍ រវាងកងកម្លាំងប្រជាធិបតេយ្យស៊ីរី(SDF)គាំទ្រដោយក្រុមឃើដ និងកងកម្លាំងរដ្ឋាភិបាលស៊ីរី ។

លោក Masoud Battal គឺជាមន្រ្តីក្រុង Afrin និយាយថា មនុស្សប្រហែល ១៩.០០០គ្រសារ បានវិលត្រឡប់ទៅកាន់ផ្ទះសម្បែងរបស់ពួកគេវិញ ។

ទូរទស្សន៍រដ្ឋ Ekhbariya រាយការណ៍ថា យុទ្ធជនកងកម្លាំង SDF បានចាកចេញពីទីក្រុង Aleppo កាលពីថ្ងៃអាទិត្យ បន្ទាប់ពីមានកិច្ចព្រមព្រៀងបទឈប់បាញ់ដែលអនុញ្ញាតឲ្យមានការជម្លៀសខ្លួន ក្រោយការប៉ះទង្គិចគ្នាស្លាប់មនុស្សអស់រយៈពេលជាច្រើនថ្ងៃ ។

ការចាកចេញនេះ គឺជាការចាប់ផ្តើមនៃការដកចេញកងកម្លាំងឃើដពីតំបន់ខ្លះរបស់ទីក្រុង Aleppo ដែលពួកគេបានកាន់កាប់ ចាប់តាំងពីសង្រ្គាមស៊ីវិលស៊ីរី ផ្ទុះឡើងកាលពីឆ្នាំ ២០១១ ខណៈដែលកងកម្លាំងឃើដ បន្តគ្រប់គ្រងតំបន់ពាក់កណ្តាលស្វយ័ត នៅភាគខាងជើងស៊ីរី ។

សហរដ្ឋអាមេរិក និងប្រទេសមហាអំណាចពិភពលោកផ្សេងទៀត បានស្វាគមន៍បទឈប់បាញ់នៅដើមសប្តាហ៍នេះ ប៉ុន្តែកងកម្លាំងឃើដ បដិសេធន៍មិនព្រមចាកចេញពីតំបន់កាន់កាប់ចុងក្រោយគេ Sheikh Maksoud របស់ខ្លួននោះឡើយ ក្រោមកិច្ចព្រមព្រៀងមួយនេះ ៕