មន្ត្រីរបស់រដ្ឋ Minnesota កំពុងប្តឹងរដ្ឋបាលរបស់លោកប្រធានាធិបតី Donald Trump ពីបទ «បង្កើននូវសិទ្ធិអំណាចមិនធ្លាប់មានពីមុន» សម្រាប់អាជ្ញាធរអន្តោប្រវេសន៍សហរដ្ឋអាមេរិកនៅក្នុងរដ្ឋនេះ ជាចំណាត់ការ ដើម្បីនាំរដ្ឋបាលនេះទៅកាន់តុលាការ ពោលគឺក្រោយប៉ុន្មានថ្ងៃបន្ទាប់ពីភ្នាក់ងារសហព័ន្ធមួយរូប បានបាញ់សម្លាប់ស្ត្រីម្នាក់ នៅទីក្រុង Minneapolis។

នៅក្នុងបណ្តឹងដែលបានត្រូវបានដាក់កាលពីថ្ងៃចន្ទ (ទី១២ ខែមករា ឆ្នាំ២០២៦) រដ្ឋនេះបានចោទប្រកាន់ក្រសួងសន្តិសុខមាតុភូមិ (DHS) និងរដ្ឋមន្ត្រី DHS ពីបទដាក់ពង្រាយមន្ត្រីរាប់ពាន់នាក់ នៅទីក្រុង Minneapolis និង St Paul ដោយសារតែ «មានបំណងចង់ធ្វើទុក្ខបុកម្នេញគូប្រជែងនយោបាយ និងទទួលបានផលចំណេញផ្នែកនយោបាយ។

រដ្ឋនេះកំពុងជំទាស់តវ៉ាថា ការដាក់ពង្រាយនេះរំលោភលើរដ្ឋធម្មនុញ្ញរបស់សហរដ្ឋអាមេរិក និងជាការសងសឹកប្រឆាំងនឹងថ្នាក់ដឹកនាំជាប់ឆ្នោតរបស់គណបក្សប្រជាធិបតេយ្យ។ មន្ត្រីរដ្ឋ Minnesota ចោទប្រកាន់គោលនយោបាយរបស់រដ្ឋបាលនេះ ដូចជាការឲ្យមន្ត្រីពាក់ម៉ាស់ជាដើម រំលោភច្បាប់រដ្ឋ និងថា ភ្នាក់ងារនេះកំពុងប្រើប្រាស់កម្លាំងជ្រុលហួស និងចាប់ខ្លួនមនុស្សដែលពួកគេសង្ស័យថា មិនមានច្បាប់រស់នៅក្នុងសហរដ្ឋអាមេរិក ដោយខុសច្បាប់។

ការតវ៉ាបានផ្ទុះឡើងនៅទូទាំងប្រទេស បន្ទាប់ពីលោកស្រី Renee Nicole Good ត្រូវបានបាញ់សម្លាប់ដោយមន្ត្រីអនុវត្តច្បាប់អន្តោប្រវេសន៍ និងគយ (ICE) កាលពីថ្ងៃទី៧ ខែមករា ខណៈពេលដែលលោកស្រីកំពុងបើកបររថយន្ត។ មន្ត្រីរដ្ឋ Minnesota បានថ្កោលទោសការបាញ់ប្រហារនេះថា ជាការប្រព្រឹត្តិមិនសមហេតុផល ដោយលើកឡើងពីវីដេអូដែលមានការប្រឈមមុខដាក់គ្នា ខណៈពេលដែលរដ្ឋបាល បានការពារមន្ត្រីនោះ៕