លោក Peter Szijjarto រដ្ឋមន្ត្រីក្រសួងការបរទេស និងទំនាក់ទំនងសេដ្ឋកិច្ចបរទេស បាននិយាយថា ពលរដ្ឋប៉ូឡូញជាច្រើននាក់ដែលត្រូវបានអាជ្ញាធរធ្វើទុក្ខបុកម្នេញនៅក្នុងប្រទេសរបស់ពួកគេ ត្រូវបានផ្តល់សិទ្ធិជ្រកកោននយោបាយ នៅក្នុងប្រទេសហុងគ្រី ដោយបញ្ជាក់ថា ជំហានបែបនេះ គោរពតាមស្តង់ដា  សហភាពអឺរ៉ុបទាំងស្រុង។

លោកបានប្រាប់អ្នកយកព័ត៌មាន បន្ទាប់ពីកិច្ចប្រជុំជាមួយមេដឹកនាំគណបក្សស្តាំនិយមលីទុយអានី Dawn of Nemunas គឺលោក Remigijus Zemaitaitis ថា៖«លទ្ធិប្រជាធិបតេយ្យ និងនីតិរដ្ឋ នៅក្នុងប្រទេសប៉ូឡូញ កំពុងស្ថិតក្នុងវិបត្តិ និងស្ថិតនៅក្រោមការគំរាមកំហែង»។

លោក Szijjarto បាននិយាយដោយមិនបញ្ចេញឈ្មោះពួកគេថា៖«យើងបានផ្តល់សិទ្ធិជ្រកកោន និងឋានៈជាជនភៀសខ្លួន ដល់មនុស្សជាច្រើននាក់ដែលបានរងនូវការធ្វើទុក្ខបុកម្នេញផ្នែកនយោបាយ នៅក្នុងប្រទេសប៉ូឡូញ»។

នាពេលថ្មីៗនេះ ទីក្រុងវ៉ាសូវី បាននិយាយថា អតីតរដ្ឋមន្ត្រីក្រសួងយុត្តិធម៌ និងជាអគ្គរដ្ឋអាជ្ញា សមាជិកប្រឆាំងនៃសភាប៉ូឡូញ លោក Zbigniew Ziobro ដែលកំពុងរត់គេចពីការចោទប្រកាន់ព្រហ្មទណ្ឌ បានទទួលសិទ្ធិជ្រកកោននយោបាយនៅក្នុងប្រទេសហុងគ្រី។ នៅក្នុងប្រទេសកំណើតរបស់លោក លោកត្រូវបានចោទប្រកាន់ចំនួន ២៦ ករណី ក្នុងនោះមានការក្លែងបន្លំជាមួយមូលនិធិពីមូលនិធិយុត្តិធម៌ និងការលួចស្តាប់ទូរស័ព្ទខុសច្បាប់របស់អ្នកនយោបាយប៉ូឡូញចំនួន ៥៧៨ រូប។

ប្រទេសហុងគ្រីជឿជាក់ថា អាជ្ញាធរប៉ូឡូញបច្ចុប្បន្ន កំពុងធ្វើទុក្ខបុកម្នេញលើលោក Ziobro ដោយសារតែហេតុផលនយោបាយតែប៉ុណ្ណោះ។ កាលពីខែវិច្ឆិកា ឆ្នាំមុន លោកនាយករដ្ឋមន្ត្រី Viktor Orban បានទទួលលោកនៅគេហឋានរបស់លោក នៅទីក្រុងប៊ុយដាប៉ែស( Budapest)៕