ក្រុមហ៊ុនប្រព័ន្ធផ្សព្វផ្សាយ British Broadcasting Corp (BBC) បានបង្ហាញទឡ្ហីករណ៍មួយចំនួនរបស់ខ្លួន ដើម្បីការពារទល់នឹងបណ្តឹងបរិហារកេរ្តិ៍ដែលទារសំណងចំនួន ១០ពាន់លានដុល្លារអាមេរិក ពីសំណាក់ប្រធានាធិបតីអាមេរិក លោក Donald Trump ដោយបានប្រាប់ចៅក្រមថា ភាពយន្តឯកសារ ដែលជាចំណុចសំខាន់នៃសំណុំរឿងនេះ គឺស្អាតស្អំ ទោះបីជាមានការកែសម្រួលផ្នែកមួយនាំឲ្យភ័ន្តច្រឡំក៏ដោយ។

ប្រព័ន្ធផ្សព្វផ្សាយ BBC កាលពីថ្ងៃចន្ទ (ទី១២ ខែមករា ឆ្នាំ២០២៦) បានស្នើសុំចៅក្រមសហព័ន្ធមួយរូប នៅទីក្រុង Miami ឲ្យផ្អាកការផ្លាស់ប្តូរភស្តុតាងនៅក្នុងបណ្តឹងនេះ ដែលត្រូវបានដាក់កាលពីខែធ្នូឆ្នាំមុន រហូតដល់មានការចេញសេចក្តីសម្រេច ស្ដីពីញត្តិជំទាស់របស់ប្រព័ន្ធផ្សព្វផ្សាយនេះ ដែលស្នើឲ្យបដិសេធសំណុំរឿងនេះ ដោយការប្រកាសនោះគ្រោងធ្វើនៅក្នុងខែមីនា។

ជាមួយគ្នានេះ ប្រព័ន្ធផ្សព្វផ្សាយ BBC ក៏បានឲ្យដឹងផងដែរថា ខ្លួននឹងមានគោលបំណងផ្ទេរសំណុំរឿងនេះ ពីរដ្ឋ Florida ទៅរដ្ឋ New York ប្រសិនបើបណ្តឹងមិនត្រូវបានច្រានចោលទេ ពីព្រោះការអះអាង មានពាក់ព័ន្ធនឹងភាពយន្តឯកសារ ដែល BBC «មិនបានបង្កើតឡើងនៅរដ្ឋ Florida ផលិតនៅរដ្ឋ Florida ឬចាក់ផ្សាយនៅរដ្ឋ Florida ឡើយ»។

គួបញ្ជាក់ថា លោក Trump បានប្តឹងពីបទកែសម្រួលដោយមិនត្រឹមត្រូវ នៅក្នុងភាពយន្តឯកសារ មុនការបោះឆ្នោតប្រធានាធិបតីឆ្នាំ២០២៤ ដែលធ្វើឲ្យមានការយល់ច្រឡំថា លោកបានអំពាវនាវដោយផ្ទាល់ឲ្យបង្កអំពើហិង្សា នៅក្នុងសុន្ទរកថាមួយ មុនមានការវាយប្រហារដោយអ្នកគាំទ្ររបស់លោក កាលពីថ្ងៃទី៦ ខែមករា ឆ្នាំ២០២១ នៅវិមាន Capitol របស់សហរដ្ឋអាមេរិក។

ប្រធាន BBC លោក Samir Shah បានទទួលស្គាល់កាលពីថ្ងៃទី១០ ខែវិច្ឆិកាឆ្នាំមុនថា វីដេអូដែលត្រូវបានកែសម្រួលនៃសុន្ទរកថារបស់លោក Trump ដែលបានចាក់ផ្សាយនៅលើកម្មវិធី Panorama ក្នុងឆ្នាំ២០២៤ បានធ្វើឲ្យមានការយល់ខុស ដែលថា មានការអំពាវនាវដោយផ្ទាល់ឲ្យបង្កសកម្មភាពហិង្សា»។ ប៉ុន្មានថ្ងៃក្រោយមក ប្រព័ន្ធផ្សព្វផ្សាយនេះបានចេញការសុំអភ័យទោសលើកទី២ ប៉ុន្តែបានបដិសេធការទាមទារសំណងរបស់មេដឹកនាំអាមេរិក៕