ប្រភពយោធានិយាយប្រាប់កាសែត Al Jazeera ថា កងកម្លាំងគាំទ្ររហ័ស(RSF) បានសម្លាប់មនុស្ស ២៧នាក់ អំឡុងការវាយប្រហារយានដ្រូនដាច់ដោយឡែកលើមូលដ្ឋានកងទ័ពស៊ូដង់ ស្ថិតនៅទីក្រុងភាគអាគ្នេយ៍ Sinja ។

ការវាយប្រហារកាលពីថ្ងៃចន្ទនេះ គាប់ជួននឹងសេចក្តីប្រកាសកាលពីរយៈពេល ១ថ្ងៃមុនថា រដ្ឋាភិបាលដែលចូលរួមជាមួយកងកម្លាំងប្រដាប់អាវុធស៊ូដង់(SAF)នឹងវិលត្រឡប់ទៅកាន់រដ្ឋធានី Khartoum វិញ រយៈពេល ៣ឆ្នាំ ក្រោយពួកគេបានផ្លាស់ប្តូរមូលដ្ឋានទ័ពទៅកាន់ទីក្រុង Port Sudan ។

កងកម្លាំង SAF និងកងកម្លាំង RSF បានជាប់ផុងក្នុងសង្រ្គាមស៊ីវិលដ៏ឃោឃៅ ចាប់តាំងពីខែមេសា ឆ្នាំ ២០២៣រហូតមក ក្នុងនោះរដ្ឋ Khartoum បានក្លាយជាចំណុចកណ្តាលនៃជម្លោះ ។

ប្រភពយោធាដែលសុំមិនបញ្ចេញឈ្មោះ និយាយប្រាប់កាសែត Al Jazeera ថា កាលវាយប្រហារយានដ្រូនកាលពីថ្ងៃចន្ទ មិនត្រឹមតែមានគោលដៅលើមេដឹកនាំកងកម្លាំងរដ្ឋាភិបាលប៉ុណ្ណោះទេ ប៉ុន្តែមានគោលដៅលើកងកម្លាំងសន្តិសុខ និងជនស៊ីវិលដែលអមដំណើរពួកគេផងដែរ ។ 

គេនៅមិនទាន់ដឹងច្បាស់នោះទេថាតើមានមនុស្សប៉ុន្មាននាក់ បានរងរបួសនៅក្នុងការវាយប្រហារយានដ្រូន ។ កាសែត Al Jazeera ទទួលបានសេចក្តីរាយការណ៍ថា មនុស្ស ១៣នាក់ បានរងរបួស ប៉ុន្តែតួលេខនេះ អាចនឹងមានចំនួនខ្ពស់ជាងនេះ ។

យោងតាមសេចក្តីថ្លែងការណ៍របស់រដ្ឋាភិបាល បានឲ្យដឹងថា លោក Qamar al-Din Fadl al-Mawla ដែលជាអភិបាលរដ្ឋ White Nile ស្ថិតនៅក្នុងចំណោមក្រុមមន្រ្តីនៅទីក្រុង Sinja ពេលដែលការវាយប្រហារកើតឡើង ។ ស្របពេលដែលរូបលោកនៅរស់ សហការី ២នាក់របស់លោក ត្រូវបានគេរាយការណ៍ថា បានស្លាប់ ៕