យោងតាមសេចក្តីរាយការណ៍ពីកាសែត New York Times បានឲ្យដឹងថា យោធាសហរដ្ឋអាមេរិករងការចោទប្រកាន់ថា បានក្លែងបន្លំយន្តហោះមួយគ្រឿងក្នុងចំណោមយន្តហោះរបស់ពួកគេជាយន្តហោះស៊ីវិល ដើម្បីវាយប្រហារទូកសង្ស័យរត់ពន្ធគ្រឿងញៀន ចេញពីប្រទេសវេណេស៊ុយអេឡា ។

នៅក្នុងអត្ថបទចុះផ្សាយកាលពីយប់ថ្ងៃចន្ទ កាសែតមួយនេះកត់សំគាល់ឃើញថា ឧបទ្ទេវហេតុនេះ កើតជាសំនួរចំពោះលទ្ធភាពនៃការប្រព្រឹត្តឧក្រិដ្ឋកម្មសង្រ្គាម ។

នៅមិនទាន់មានប្រតិកម្មភ្លាមៗនោះទេពីសេតវិមាន បន្ទាប់ពីការចុះផ្សាយសេចក្តីរាយការណ៍នេះ ។ អត្ថបទចុះផ្សាយនេះ ផ្តោតសំខាន់លើការវាយប្រហារដំបូងនៅក្នុងយុទ្ធនាការទម្លាក់គ្រាប់បែកលើទូកដែលលោកប្រធានាធិបតី Donald Trump បានចាប់ផ្តើមកាលពីថ្ងៃទី ២ ខែកញ្ញា ឆ្នាំ ២០២៥ នៅភាគខាងត្បូងសមុទ្រការ៉ាអ៊ីប ។

នៅពេលនោះ លោក Trump បានប្រកាសលើបណ្តាញព័ត៌មានសង្គម Truth Social ថា ការវាយប្រហារដំបូងបានសម្លាប់មនុស្ស ១១នាក់ ដែលលោកចោទប្រកាន់ថា ជាភេវរករគ្រឿងញៀន ។

ប៉ុន្តែសេចក្តីរាយការណ៍របស់កាសែត New York Times លើកឡើងថា យន្តហោះដែលប្រើប្រាស់នៅក្នុងប្រតិបត្តិការយោធា ត្រូវបានគេលាបថ្នាំដូចជាយន្តហោះស៊ីវិលបំពាក់មីស៊ីលនៅក្រោមតួយន្តហោះ ។

សូមបញ្ជាក់ថា ការវាយប្រហារយ៉ាងហោច ៣៥លើក ត្រូវបានធ្វើឡើងនៅសមុទ្រការ៉ាអ៊ីប និងភាគខាងកើតមហាសមុទ្រប៉ាស៊ីហ្វិក ចាប់តាំងពីថ្ងៃទី ២ ខែកញ្ញារហូតមក ក្នុងនោះមនុស្ស ១១៤នាក់ ត្រូវបានសម្លាប់ ៕