អ្នកការទូតជាន់ខ្ពស់របស់អាល្លឺម៉ង់ កាលពីថ្ងៃចន្ទ (ទី១២ ខែមករា ឆ្នាំ២០២៦) បាននិយាយសម្រាលហានិភ័យ ដែលអាចមានការវាយប្រហាររបស់សហរដ្ឋអាមេរិក លើកោះ Greenland ទោះបីជាប្រធានាធិបតី លោក Donald Trump បានគំរាមកំហែងម្តងហើយម្តងទៀតថា នឹងដណ្តើមកាន់កាប់ដែនដីស្វយ័តរបស់ដាណឺម៉ាកនេះក៏ដោយ។

លោក Trump បានលើកឡើងពីគំនិតដែលអាចទិញ ឬបញ្ចូលទឹកដីតំបន់អាក់ទិកមួយនេះជាឧបសម្ព័ន្ធ អស់រយៈពេលជាច្រើនឆ្នាំមកហើយ ហើយបានធ្វើឲ្យមានភាពតានតឹងកាន់តែខ្លាំងឡើងបន្ថែមទៀត ក្នុងសប្តាហ៍នេះ ដោយនិយាយថា សហរដ្ឋអាមេរិកនឹងយកដែនដីនេះ «តាមមធ្យោបាយមួយ ឬមធ្យោបាយផ្សេងទៀត»។

នៅពេលត្រូវបានសួរ អំពីចំណាត់ការយោធាជាឯកតោភាគីរបស់លោក Trump រដ្ឋមន្ត្រីការបរទេសអាល្លឺម៉ង់ លោក Johann Wadephul បាននិយាយថា លោក «មិនមានអ្វីត្រូវចង្អុលបង្ហាញថា រឿងនេះកំពុងត្រូវបានគិតគូរយ៉ាងម៉ត់ចត់នោះឡើយ»។

បន្ទាប់ពីមានកិច្ចប្រជុំជាមួយរដ្ឋមន្ត្រីការបរទេសអាមេរិក លោក Marco Rubio លោក Wadephul បានប្រាប់អ្នកសារព័ត៌មានថា «ខ្ញុំជឿថា មានផលប្រយោជន៍រួមគ្នា ក្នុងការដោះស្រាយបញ្ហាសន្តិសុខដែលលេចឡើងនៅក្នុងតំបន់អាក់ទិក ហើយយើងគួរតែធ្វើដូច្នេះ ហើយយើងនឹងធ្វើដូច្នេះ»។

លោក Wadephul បានបន្ថែមថា អង្គការណាតូ (NATO) កំពុងស្ថិតក្នុងដំណើរការនៃការបង្កើត «ផែនការជាក់ស្តែងបន្ថែមទៀត ជុំវិញបញ្ហានេះ» ដែលនឹងត្រូវពិភាក្សាជាមួយដៃគូអាមេរិក។

ដំណើរការនេះកើតឡើងមុនការចរចា នាសប្តាហ៍នេះ នៅទីក្រុងវ៉ាស៊ីនតោន រវាងលោក Rubio និងអ្នកការទូតជាន់ខ្ពស់មកពីប្រទេសដាណឺម៉ាក និងដែនដី Greenland។ រដ្ឋាភិបាលកោះ Greenland បានបញ្ជាក់ម្តងទៀតកាលពីថ្ងៃចន្ទថា ខ្លួននឹងមិនទទួលយកការគ្រប់គ្រងរបស់សហរដ្ឋអាមេរិក ទោះក្រោម «កាលៈទេសៈណាក៏ដោយ»៕