គណបក្សគាំទ្រយោធាដ៏លេចធ្លោរបស់សហភាពមីយ៉ាន់ម៉ា នាថ្ងៃអង្គារ (ទី១៣ ខែមករា ឆ្នាំ២០២៦) នេះ បានអះអាងពីការទទួលបានសំឡេងភាគច្រើននៃអាសនៈសភាជាន់ទាប នៅក្នុងការបោះឆ្នោតដែលដឹកនាំដំណើរការដោយរបបយោធារបស់ប្រទេសនេះ ជាព្រឹត្តិការណ៍ដែលអ្នកឃ្លាំមើលលទ្ធិប្រជាធិបតេយ្យ លើកឡើងថា នឹងគ្រាន់តែធ្វើឲ្យការក្តោបក្ដាប់អំណាចរបស់កងកម្លាំងប្រដាប់អាវុធមានរយៈពេលយូរប៉ុណ្ណោះ។

យោធាបានគ្រប់គ្រងមីយ៉ាន់ម៉ាដោយកម្លាំង ពោលគឺស្ទើរតែទាំងអស់នៃប្រវត្តិសាស្ត្រ ក្រោយការទទួលបានឯករាជ្យរបស់ប្រទេសនេះ មុនពេលបទពិសោធន៍អនុវត្តលទ្ធិប្រជាធិបតេយ្យរយៈពេល ១ទសវត្សរ៍ បានផ្តល់ឱកាសឲ្យអ្នកនយោបាយស៊ីវិលនូវការគ្រប់គ្រងមិនប្រាកដប្រជាមួយ។ ប៉ុន្តែបណ្ដាឧត្តមសេនីយ៍ បានដណ្តើមអំណាចមកវិញ នៅក្នុងរដ្ឋប្រហារឆ្នាំ២០២១ ដោយផ្តួលរំលំរដ្ឋាភិបាលរបស់លោកស្រី អ៊ុងសាន ស៊ូជី (Aung San Suu Kyi) ហើយរុញឲ្យប្រទេសធ្លាក់ចូលទៅក្នុងភ្នក់ភ្លើងសង្គ្រាមស៊ីវិលរហូតមកដល់សព្វថ្ងៃ។

ហើយពេលនេះ របបយោធាកំពុងត្រួតពិនិត្យការបោះឆ្នោតរៀបចំឡើងដោយបង្ខំ ដែលខ្លួនសន្យាថា នឹងប្រគល់អំណាចទៅឲ្យប្រជាជនវិញ បន្ទាប់ពីបញ្ចប់ដំណាក់កាលទី៣ និងចុងក្រោយនៃការបោះឆ្នោត នាថ្ងៃទី២៥ ខែមករា។ អ្នកគាំទ្រលទ្ធិប្រជាធិបតេយ្យ លើកឡើងថា ដំណើរការនេះត្រូវបានក្លែងបន្លំដោយសារការដកឈ្មោះអ្នកប្រឆាំង ហើយសន្លឹកឆ្នោតមានសុទ្ធតែបេក្ខជននៅក្នុងគណបក្សសាមគ្គីភាព និងអភិវឌ្ឍន៍សហភាព (USDP) ដែលជាសម្ព័ន្ធមិត្តរបស់យោធា។

ដោយបាននិយាយក្នុងលក្ខខណ្ឌមិនបញ្ចេញឈ្មោះ ដោយសារតែពួកគេមិនត្រូវបានអនុញ្ញាតឲ្យបង្ហាញលទ្ធផលនេះ មន្ត្រីគណបក្ស USDP បានប្រាប់សារព័ត៌មាន AFP ថា ពួកគេ «ឈ្នះបាន ៨៧ ក្នុងចំណោម ១០០អាសនៈ នៅក្នុងដំណាក់កាលទី២ នៃការបោះឆ្នោតកាលពីថ្ងៃអាទិត្យ។ បូកបញ្ចូលគ្នាជាមួយនឹងជ័យជម្នះដ៏លើសលប់ដែលបានបញ្ជាក់នៅដំណាក់កាលទី១ តួលេខរបស់មន្ត្រីរូបនេះ នាំឲ្យគណបក្សនេះមានអាសនៈសភាជាន់ទាបចំនួន ១៧៦ រហូតមកដល់ពេលនេះ ពោលគឺជាងពាក់កណ្តាលនៃចំនួន ៣៣០កៅអី សូម្បីតែដំណាក់កាលទី៣ មិនទាន់ចាប់ផ្ដើម៕