មន្ត្រីអ៊ីរ៉ង់ម្នាក់ បាននិយាយនៅថ្ងៃអង្គារ (ទី១៣ ខែមករា ឆ្នាំ២០២៦) នេះថា មនុស្សប្រហែលជា ២.០០០នាក់ ក្នុងនោះរួមមានទាំងបុគ្គលិកសន្តិសុខផងដែរ ត្រូវបានសម្លាប់អំឡុងការតវ៉ានៅក្នុងប្រទេសអ៊ីរ៉ង់ ដោយនេះគឺជាលើកដំបូងដែលអាជ្ញាធរបានទទួលស្គាល់ចំនួនអ្នកស្លាប់ខ្ពស់នេះ ពោលគឺបណ្ដាលមកពីការបង្ក្រាបយ៉ាងខ្លាំងក្លាលើភាពចលាចលទូទាំងប្រទេសរយៈពេល ២សប្តាហ៍។

អំឡូងពេលនិយាយទៅកាន់ទីភ្នាក់ងារសារព័ត៌មាន Reuters មន្ត្រីអ៊ីរ៉ង់រូបនេះ បានប្រាប់ថា អ្វីដែលលោកហៅថា ពួកភេរវករនោះ គឺជាអ្នកនៅពីក្រោយការស្លាប់ទាំងអ្នកតវ៉ា និងបុគ្គលិកសន្តិសុខនេះ។ មន្ត្រីរូបនេះមិនបានផ្ដល់ភាពលម្អិតពិតប្រាកដ អំពីអ្នកដែលត្រូវបានសម្លាប់នោះឡើយ។

គួរបញ្ជាក់ថា ភាពចលាចលដែលបង្កឡើងដោយស្ថានភាពសេដ្ឋកិច្ចដ៏អាក្រក់នោះ គឺជាបញ្ហាប្រឈមផ្ទៃក្នុងដ៏ធំបំផុត សម្រាប់អាជ្ញាធរអ៊ីរ៉ង់ ដែលយ៉ាងហោចណាស់មានរយៈពេល ៣ឆ្នាំមកហើយ ហើយកើតឡើងចំពេលមានសម្ពាធអន្តរជាតិកាន់តែខ្លាំងឡើងៗ បន្ទាប់ពីមានការវាយប្រហាររបស់អ៊ីស្រាអែល និងសហរដ្ឋអាមេរិក កាលពីឆ្នាំមុន។

អាជ្ញាធរអ៊ីរ៉ង់ បានព្យាយាមប្រើវិធីសាស្រ្ត ២យ៉ាង ចំពោះការតវ៉ានេះ ដោយចាត់ទុកការតវ៉ា ជុំវិញបញ្ហាសេដ្ឋកិច្ចថា ស្របច្បាប់ ខណៈដែលអនុវត្តការបង្ក្រាបសន្តិសុខយ៉ាងធ្ងន់ធ្ងរ។ ពួកគេបានចោទប្រកាន់សហរដ្ឋអាមេរិក និងអ៊ីស្រាអែលថា បានញុះញង់ឲ្យមានភាពចលាចលនេះ ហើយបាននិយាយថា មនុស្សមិនមានអត្តសញ្ញាណ ដែលពួកគេហៅថា ជាពួកភេរវករ បានជ្រៀតចូលក្នុងចលនាតវ៉ានេះ។

នៅមុននេះ ក្រុមសិទ្ធិមនុស្សមួយ បានកំណត់អត្តសញ្ញាណមនុស្សរាប់រយនាក់ដែលត្រូវបានសម្លាប់ ហើយបានឲ្យដឹងទៀតថា មនុស្សរាប់ពាន់នាក់ត្រូវបានចាប់ខ្លួន៕