កាសែត Yomiuri របស់ជប៉ុន បានរាយការណ៍នៅថ្ងៃពុធ (១៤ មករា) នេះថា នាយករដ្ឋមន្ត្រីជប៉ុន លោកស្រី Sanae Takaichi កំពុងពិចារណាកោះហៅឱ្យមានការបោះឆ្នោតសភាជាន់ទាបមុនអាណត្តិ នៅថ្ងៃទី៨ ខែកុម្ភៈ ឆ្នាំ២០២៦ ដ៏ឆាប់ខាងមុខ បន្ទាប់ពីរំលាយសភានៅសប្តាហ៍ក្រោយនេះ។

សារព័ត៌មាន Yomiuri បាននិយាយថា ថវិកាជាតិឆ្នាំសារពើពន្ធ ២០២៦ ទំនងជាមិនត្រូវបានអនុម័តដោយសភានៅចុងឆ្នាំសារពើពន្ធបច្ចុប្បន្នក្នុងខែមីនាទេ ប្រសិនបើការបោះឆ្នោតត្រូវបានធ្វើឡើងមែននោះ ហើយលោកស្រី Takaichi កំពុងពិចារណាលើថវិកាបណ្តោះអាសន្នមួយ ខណៈលោកស្រីបានសន្យាថា នឹងដាក់ចេញវិធានការទប់ទល់អតិផរណាឱ្យបានឆាប់តាមដែលអាចធ្វើទៅបាន។

កាលពីថ្ងៃអង្គារ ទីភ្នាក់ងារសារព័ត៌មានក្យូដូ បាននិយាយថា លោកស្រី Takaichi បានប្រាប់ទៅនាយកប្រតិបត្តិគណបក្សកាន់អំណាច អំពីផែនការរបស់លោកស្រី ក្នុងការរំលាយសភាជាន់ទាប នៅពេលចាប់ផ្តើមសម័យប្រជុំធម្មតារបស់ខ្លួន ដោយបើកផ្លូវសម្រាប់ការបោះឆ្នោតមុនកាលកំណត់។ ប្រសិនបើរឿងនោះកើតឡើងមែន នោះសភានឹងឈប់សម្រាកភ្លាមៗបន្ទាប់ពីការកោះប្រជុំនៅថ្ងៃទី២៣ ខែមករា ដែលនឹងពន្យារពេលការអនុម័តថវិការដ្ឋ និងច្បាប់ផ្សេងទៀត។

ក្រុមចម្រុះកាន់អំណាចរបស់លោកស្រី Takaichi កាន់កាប់សំឡេងភាគច្រើនយ៉ាងស្ដួចស្ដើងបំផុតក្នុងសភាជាន់ទាប ប៉ុន្តែពុំមានសំឡេងភាគច្រើននៅសភាជាន់ខ្ពស់ទេ។ ជ័យជម្នះក្នុងការបោះឆ្នោត អាចជំរុញការក្ដោបក្តាប់អំណាចរបស់លោកស្រី Takaichi លើសភាជាន់ទាបដ៏មានឥទ្ធិពល ប៉ុន្តែក៏នៅតែតម្រូវឱ្យលោកស្រីស្វែងរកកិច្ចសហប្រតិបត្តិការពីគណបក្សប្រឆាំង ដើម្បីអនុម័តច្បាប់នៅក្នុងសភាជាន់ខ្ពស់ផងដែរ៕