លោកប្រធានាធិបតីអ៊ុយក្រែន Volodymyr Zelenskyy បានថ្លែងកាលពីថ្ងៃអង្គារ១៣មករាសប្ដាហ៍នេះថា រលកវាយប្រហារដ៏ខ្លាំងក្លាដោយយានដ្រូនរបស់រុស្ស៊ីបានធ្វើឱ្យមនុស្សរាប់ម៉ឺនគ្រួសារក្នុងតំបន់រដ្ឋធានីគីវ គ្មានអគ្គិសនីប្រើប្រាស់ ខណៈសីតុណ្ហភាពត្រជាក់ធ្លាក់ ក្រោមសូន្យអង្សាសេ។  

លោក Vitaliy Klitschko អភិបាលក្រុងគីវ បាននិយាយថា អគារខ្ពស់ៗប្រហែល ៥០០ ខ្នងគ្មានម៉ាស៊ីនកម្ដៅ ហើយមានការខ្វះខាតអគ្គិសនីធ្ងន់ធ្ងរសូម្បីតែសម្រាប់ហេដ្ឋារចនាសម្ព័ន្ធសំខាន់ៗ។

លោក Zelenskyy បាននិយាយក្នុងការបង្ហោះតាមប្រព័ន្ធផ្សព្វផ្សាយសង្គមកាលពីថ្ងៃអង្គារសប្ដាហ៍នេះថា រុស្ស៊ីបានវាយប្រហារដោយយានដ្រូនជាង ៣០០ គ្រឿងទៅលើប្រទេសអ៊ុយក្រែនពេញមួយយប់ ក៏ដូចជាមីស៊ីលផ្លោងចំនួន ១៨ គ្រាប់ និងមីស៊ីលតម្រង់គោលដៅចំនួន ៧ គ្រាប់។ លោកថា សរុបមក តំបន់ចំនួន៨ ត្រូវបានវាយប្រហាររួមទាំងរដ្ឋធានីផងដែរ។  

លោក Zelenskyy បាននិយាយថា ស្ថានភាពនៅក្នុងតំបន់គីវមិនល្អ មនុស្សរាប់ម៉ឺនគ្រួសារបច្ចុប្បន្នគ្មានអគ្គិសនីប្រើប្រាស់។ជាថ្មីម្តងទៀត គោលដៅសំខាន់នៃការវាយប្រហារគឺកន្លែងផលិតថាមពល និងអនុស្ថានីយរបស់អ៊ុយក្រែន។

រុស្ស៊ីបានកំណត់គោលដៅម្តងហើយម្តងទៀតទៅលើហេដ្ឋារចនាសម្ព័ន្ធថាមពលរបស់អ៊ុយក្រែនដោយយានដ្រូន និងមីស៊ីលចាប់តាំងពីការលុកលុយរបស់ខ្លួនក្នុងឆ្នាំ ២០២២ ក្នុងគោលបំណងរំខានដល់ការផ្គត់ផ្គង់កម្ដៅក្នុងរដូវរងា ៕