ប្រធានាធិបតីអាមេរិក លោក Donald Trump កាលពីថ្ងៃអង្គារ (១៣ មករា) បានជំរុញឱ្យប្រជាជនអ៊ីរ៉ង់ បន្តតវ៉ាទៀត និងត្រូវចងចាំឈ្មោះអ្នកដែលធ្វើបាបពួកគេទុក ដោយនិយាយថា ជំនួយកំពុងជិតទៅដល់ហើយ ខណៈលោកបានច្រានចោលកិច្ចប្រជុំទាំងអស់ជាមួយមន្រ្តីអ៊ីរ៉ង់ ស្របពេលស្ថាប័នកាន់អំណាចបែបសាសនារបស់អ៊ីរ៉ង់មួយនេះ បានបង្កើនការបង្ក្រាបរបស់ខ្លួនប្រឆាំងនឹងបាតុកម្ម។

អ៊ីរ៉ង់ចោទប្រកាន់លោក Trump ថាបានលើកទឹកចិត្តឱ្យមានអស្ថិរភាពនយោបាយ និងញុះញង់ឱ្យមានអំពើហិង្សា។ ក្នុងសារមួយលើបណ្ដាញសង្គម Truth Social លោក Trump បានសរសេរថា «អ្នកស្នេហាជាតិអ៊ីរ៉ង់អើយ ចូរបន្តតវ៉ា - ចូរយកស្ថាប័នរបស់អ្នកមកគ្រប់គ្រង!!!... ជំនួយជិតទៅដល់ហើយ» ដោយមិនបញ្ជាក់ថាជំនួយនោះអាចជាអ្វីទេ។

លោក Trump បាននិយាយថា លោកបានលុបចោលជំនួបចរចាទាំងអស់ជាមួយក្រុមមន្ត្រីអ៊ីរ៉ង់ រហូតដល់ការ «កាប់សម្លាប់ដោយឥតន័យខ្លឹមសារ» លើក្រុមបាតុករ ត្រូវបានបញ្ឈប់ ហើយនៅក្នុងសុន្ទរកថាក្រោយមកទៀត លោកបានប្រាប់ប្រជាជនអ៊ីរ៉ង់ឱ្យ «ចងចាំឈ្មោះឃាតករ និងអ្នកដែលធ្វើបាបពួកគេទុក... ព្រោះអ្នកទាំងអស់នោះនឹងត្រូវតបស្នងមកវិញក្នុងតម្លៃដ៏ខ្ពស់បំផុត»។

នៅពេលត្រូវសាកសួរបញ្ជាក់ថា តើលោកចង់មានន័យបែបណាដោយឃ្លាថា «ជំនួយជិតទៅដល់» នោះ លោក Trump បានប្រាប់អ្នកយកព័ត៌មានវិញថា «ពួកគេនឹងដឹងដោយខ្លួនឯង»។

សូមជម្រាបជូនថា ប៉ុន្មានថ្ងៃមកនេះ លោក Trump បាននិយាយថា សកម្មភាពយោធាគឺជាជម្រើសមួយក្នុងចំណោមជម្រើសដែលលោកកំពុងថ្លឹងថ្លែងដើម្បីដាក់ទណ្ឌកម្មអ៊ីរ៉ង់ ជុំវិញការបង្ក្រាបយ៉ាងឃោរឃៅលើបាតុកម្មនេះ៕