ប្រភពព័ត៌មានចំនួន៤ ដែលដឹងបញ្ហានេះបាននិយាយថា រដ្ឋាភិបាលសហរដ្ឋអាមេរិក បានដាក់សំណើសុំដីកាពីតុលាការ ដើម្បីរឹបអូសនាវាដឹកប្រេងរាប់សិបគ្រឿងបន្ថែមទៀត ដែលជាប់ទាក់ទងនឹងពាណិជ្ជកម្មប្រេងរបស់ប្រទេសវ៉េណេស៊ុយអេឡា ខណៈទីក្រុងវ៉ាស៊ីនតោន កំពុងពង្រឹងការគ្រប់គ្រងបណ្ដាញដឹកជញ្ជូនប្រេង ទាំងចូលនិងចេញ ពីប្រទេសអាមេរិកខាងត្បូងមួយនេះ។

យោធាអាមេរិក និងឆ្មាំល្បាតឆ្នេរ បានរឹបអូសនាវាចំនួន ៥គ្រឿងរួចមកហើយ ក្នុងប៉ុន្មានសប្តាហ៍ថ្មីៗនេះ នៅដែនទឹកអន្តរជាតិ ដែលដឹកប្រេងរបស់វ៉េណេស៊ុយអេឡា ឬធ្លាប់បានធ្វើដូច្នេះ កាលពីអតីតកាល។ ការរឹបអូសនេះគឺជាផ្នែកមួយនៃយុទ្ធនាការរបស់ទីក្រុងវ៉ាស៊ីនតោន ដើម្បីបង្ខំប្រធានាធិបតីវ៉េណេស៊ុយអេឡា លោក Nicolas Maduro ឱ្យចុះពីអំណាច ហើយយុទ្ធនាការនេះបានឈានប្រតិបត្តិការយោធា ដោយកងកម្លាំងអាមេរិក ចូលទៅចាប់ខ្លួនលោក នៅថ្ងៃទី៣ ខែមករា។

ចាប់តាំងពីពេលនោះមក រដ្ឋបាលរបស់លោកប្រធានាធិបតី Donald Trump បាននិយាយថា ខ្លួនមានគម្រោងគ្រប់គ្រងធនធានប្រេងរបស់វ៉េណេស៊ុយអេឡា ដោយគ្មានកំណត់ ខណៈខ្លួនកំពុងស្វះស្វែងកសាងឡើងវិញនូវឧស្សាហកម្មប្រេងដ៏ទ្រុឌទ្រោមរបស់ប្រទេសនេះ។

ប្រភពបានប្រាប់សារព័ត៌មានរ៉យទ័រថា បច្ចុប្បន្ន រដ្ឋាភិបាលអាមេរិក បានដាក់ពាក្យបណ្តឹងរដ្ឋប្បវេណីជាច្រើនករណីក្នុងតុលាការប្រចាំតំបន់ ជាពិសេសនៅទីក្រុងវ៉ាស៊ីនតោនឌីស៊ី ដើម្បីបានដីកាដែលអនុញ្ញាតឱ្យមានការឡោមព័ទ្ធ និងរឹបអូសទំនិញប្រេង និងនាវា ដែលបានពាក់ព័ន្ធនឹងការជួញដូរនេះ៕