អគ្គលេខាធិការអង្គការសហប្រជាជាតិ លោក Antonio Guterres បានព្រមាននាយករដ្ឋមន្ត្រីអ៊ីស្រាអែល លោក Benjamin Netanyahu ថាលោកអាចនាំប្រទេសរបស់លោកទៅតុលាការយុត្តិធម៌អន្តរជាតិ ប្រសិនបើប្រទេសនេះ មិនលុបចោលច្បាប់ដែលដាក់គោលដៅលើទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ (UNRWA) ហើយប្រគល់ទ្រព្យសម្បត្តិ ដែលរឹបអូសនោះមកវិញទេ។

នៅក្នុងលិខិតចុះថ្ងៃទី ៨មករា ផ្ញើទៅកាន់លោក Netanyahu លោក Guterres បាននិយាយថា អង្គការសហប្រជាជាតិមិនអាចព្រងើយកន្តើយចំពោះសកម្មភាពធ្វើឡើងដោយអ៊ីស្រាអែល ដែលជាការរំលោភដោយផ្ទាល់ទៅលើកាតព្វកិច្ចរបស់អ៊ីស្រាអែលក្រោមច្បាប់អន្តរជាតិបានទេ។ច្បាប់ទាំងនោះត្រូវតែត្រូវបានកែប្រែឡើវិញដោយមិនបង្អង់យូរ។

សភាអ៊ីស្រាអែលបានអនុម័តច្បាប់មួយក្នុងខែតុលា ឆ្នាំ ២០២៤ ដោយហាមប្រាម UNRWA មិនឱ្យធ្វើប្រតិបត្តិការក្នុងប្រទេសអ៊ីស្រាអែល និងហាមឃាត់មន្ត្រីអ៊ីស្រាអែលមិនឲ្យមានការទាក់ទងជាមួយទីភ្នាក់ងារនេះ។ បន្ទាប់មក សភាបានធ្វើវិសោធនកម្មច្បាប់កាលពីខែមុន ដើម្បីហាមប្រាមលើការផ្ដល់អគ្គិសនី ឬទឹកទៅកាន់ទីតាំងនានារបស់ UNRWA។

អាជ្ញាធរអ៊ីស្រាអែលក៏បានរឹបអូសការិយាល័យនៅទីក្រុងហ្សេរុយសេឡឹមខាងកើត(East Jerusalem ) ដែលកាន់កាប់ដោយ UNRWA កាលពីខែមុនផងដែរ ។ អង្គការសហប្រជាជាតិចាត់ទុកហ្សេរុយសេឡឹមខាងកើត ថាត្រូវកាន់កាប់ដោយអ៊ីស្រាអែល តែអ៊ីស្រាអែលចាត់ទុក Jerusalem ទាំងមូលជាផ្នែកមួយនៃប្រទេសរបស់ខ្លួន ។

លោក Guterres ថា UNRWA គឺជាផ្នែកសំខាន់មួយរបស់អង្គការសហប្រជាជាតិ ហើយបានគូសបញ្ជាក់ថា អ៊ីស្រាអែលនៅតែមានកាតព្វកិច្ចផ្តល់សិទ្ធិ និងអភ័យឯកសិទ្ធិដល់ UNRWA និងបុគ្គលិករបស់ខ្លួននូវសិទ្ធិ និងអភ័យឯកសិទ្ធិដែលបានបញ្ជាក់ក្នុងអនុសញ្ញាឆ្នាំ ១៩៤៦ ស្តីពីសិទ្ធិ និងអភ័យឯកសិទ្ធិរបស់អង្គការសហប្រជាជាតិ៕