ក្រុមហាម៉ាសបាននិយាយកាលពីថ្ងៃអង្គារ១៣មករាសប្ដាហ៍នេះថា គណៈប្រតិភូមកពីថ្នាក់ដឹកនាំរបស់ខ្លួនបានទៅដល់ទីក្រុងគែរ(Cairo)ហើយកាលពីល្ងាចថ្ងៃអង្គារ ដើម្បីពិភាក្សាជាមួយភាគីអេហ្ស៊ីប លើបទឈប់បាញ់នៅហ្កាហ្សា។

យោងតាមសេចក្តីថ្លែងការណ៍របស់ក្រុមហាម៉ាស គណៈប្រតិភូដែលដឹកនាំដោយលោក Khalil al-Hayya ប្រធានចលនានៅហ្កាហ្សា នឹងរៀបចំកិច្ចពិភាក្សាលើការបញ្ចប់ការអនុវត្តដំណាក់កាលទីមួយនៃបទឈប់បាញ់ រួមទាំងការបើកច្រកឆ្លងកាត់រ៉ាហ្វា ក្នុងទិសដៅទាំងពីរ ។  

សេចក្តីថ្លែងការណ៍បាននិយាយថា ខ្លួនក៏នឹងពិភាក្សាអំពីការពន្លឿនឆ្ពោះទៅដំណាក់កាលទីពីរផងដែរ រួមទាំងការបង្កើតគណៈកម្មាធិការរដ្ឋបាល និងការបញ្ចប់ការដកទ័ពចេញពីតំបន់ហ្កាហ្សា។

សេចក្ដីថ្លែងការណ៍នោះបាននិយាយថា គណៈប្រតិភូនេះក៏គ្រោងជួបមេដឹកនាំកងកម្លាំងប៉ាឡេស្ទីន និងក្រុមផ្សេងៗផងដែរ ដើម្បីពិភាក្សាអំពីការវិវត្តន៍នយោបាយ និងវិស័យយ៉ាងឆាប់រហ័សនៅក្នុងតំបន់ហ្កាហ្សា និងតំបន់ West Bank។

ក្រោមលក្ខខណ្ឌនៃកិច្ចព្រមព្រៀងបទឈប់បាញ់ខែតុលា ឆ្នាំ២០២៥ តំបន់ហ្កាហ្សានឹងត្រូវគ្រប់គ្រងដោយគណៈកម្មាធិការអន្តរកាលនៃក្រុមអ្នកជំនាញបច្ចេកទេសប៉ាឡេស្ទីន ដែលត្រួតពិនិត្យដោយ ក្រុមប្រឹក្សាសន្តិភាពអន្តរជាតិ។ កិច្ចព្រមព្រៀងនេះចែងថា ក្រុមហាម៉ាសត្រូវតែរំសាយអាវុធ និងគ្មានតួនាទីនាពេលអនាគតក្នុងការគ្រប់គ្រងជាផ្លូវការរបស់ដែនដីនេះនោះទេ៕