មន្ត្រីប្រទេសដាណឺម៉ាក និងដែនដីហ្គ្រីនលែន នឹងជួបពិភាក្សាបញ្ហាប្រឈមខ្ពស់អំពីអនាគតរបស់ដែនដីហ្គ្រីនលែន នៅថ្ងៃពុធ ទី១៤ ខែមករានេះ នៅសេតវិមាន ជាមួយអនុប្រធានាធិបតីសហរដ្ឋអាមេរិក លោក JD Vance ដែលបានចោទប្រកាន់ប្រទេសដាណឺម៉ាកថាមិនយកចិត្តទុកដាក់ចំពោះដែនដីស្វយ័តរបស់ខ្លួន។

ប្រធានាធិបតីអាមេរិក លោក Donald Trump បាននិយាយអំពីគំនិតទិញ ឬដាក់បញ្ចូលជាឧបសម្ព័ន្ធដែនដីកោះនៅមហាសមុទ្រអាកទិកមួយនេះរយៈពេលជាច្រើនឆ្នាំមកហើយ ហើយបានបង្កើនភាពតានតឹងបន្ថែមទៀតនៅសប្តាហ៍នេះដោយនិយាយថាសហរដ្ឋអាមេរិកនឹងយកដែនដីនេះមកគ្រប់គ្រង «តាមមធ្យោបាយមួយ ឬមធ្យោបាយផ្សេងទៀត»។

រដ្ឋមន្ត្រីការបរទេសដាណឺម៉ាក លោក Lars Lokke Rasmussen បានប្រាប់អ្នកសារព័ត៌មាននៅទីក្រុង កូភែនហាក(Copenhagen) កាលពីថ្ងៃអង្គារ ទី១៣ ខែមករា ថា លោក និងសមភាគីដែនដីហ្គ្រីនលែនរបស់លោក គឺលោកស្រី Vivian Motzfeldt ដែលបានស្នើសុំជួបជាមួយរដ្ឋមន្ត្រីការបរទេសអាមេរិក លោក Marco Rubio ហើយលោក Vance បានស្នើសុំចូលរួម និងធ្វើជាម្ចាស់ផ្ទះនៅសេតវិមាន។

បន្ទាប់ពីលោក Trump បានធ្វើសេចក្តីថ្លែងការណ៍ដដែលៗកាលពីដើមឆ្នាំ២០២៥ អំពីបំណងកាន់កាប់ដែនដីកោះហ្គ្រីនលែន លោក Vance បានប្រកាសថា លោកនឹងធ្វើទស្សនកិច្ចដោយមិនបានអញ្ជើញទៅកាន់កោះមហាសមុទ្រអាកទិកមួយនេះ ក្នុងខែមីនា។ បន្ទាប់ពីការតវ៉ាយ៉ាងខ្លាំងក្លានៅក្នុងប្រទេសដាណឺម៉ាក និងដែនដីហ្គ្រីនលែន លោកបានបញ្ចប់ដោយការកំណត់ដំណើរទស្សនកិច្ចរបស់លោកទៅកាន់មូលដ្ឋានយោធា Pituffik របស់សហរដ្ឋអាមេរិកនៅភាគពាយ័ព្យដែនដីហ្គ្រីនលែន។ ក្នុងអំឡុងពេលស្នាក់នៅរបស់លោក ដែលមានរយៈពេលត្រឹមតែប៉ុន្មានម៉ោងប៉ុណ្ណោះ លោកបានរិះគន់ប្រទេសដាណឺម៉ាកចំពោះអ្វីដែលលោកនិយាយថាខ្វះការប្តេជ្ញាចិត្តចំពោះដែនដីហ្គ្រីនលែន និងសន្តិសុខនៅតំបន់អាកទិក។