រថភ្លើងមួយខ្សែ ដែលធ្វើដំណើរពីទីក្រុងបាងកក ទៅកាន់ភាគឦសាននៃប្រទេសថៃ បានធ្លាក់ចេញពីផ្លូវដែកនៅថ្ងៃពុធ (១៤ មករា) នេះ បន្ទាប់ពីឧបករណ៍ស្ទូចសំណង់មួយ បានធ្លាក់ចំទូរថភ្លើងដឹកអ្នកដំណើរមួយ បណ្តាលឱ្យមនុស្សយ៉ាងតិច ២២នាក់ បានស្លាប់ និងមនុស្សជាង ៣០នាក់ ផ្សេងទៀតបានរងរបួស នេះបើយោងតាមការលើកឡើងរបស់អាជ្ញាធរមូលដ្ឋាន និងរបាយការណ៍ប្រព័ន្ធផ្សព្វផ្សាយ។

គ្រោះថ្នាក់នេះបានកើតឡើងនៅព្រឹកថ្ងៃពុធនេះ នៅក្នុងស្រុក ស៊ីខៀវ (Sikhio) ខេត្ត នគររាជសីមា (Nakhon Ratchasima) ចម្ងាយ ២៣០គីឡូម៉ែត្រ ភាគឦសាននៃទីក្រុងបាងកក នៅលើរថភ្លើងមួយគ្រឿង ដែលឆ្ពោះទៅកាន់ខេត្ត ឧប្បលរាជធានី (Ubon Ratchathani)។

លោក Thatchapon Chinnawong អធិការនគរបាលមូលដ្ឋានម្នាក់ក្នុងខេត្ត នគររាជសីមា បានប្រាប់សារព័ត៌មាន AFP ថា «មនុស្ស ២២នាក់បានស្លាប់ និងលើសពី ៣០នាក់ បានរងរបួស»។

នគរបាលមូលដ្ឋាននិយាយថា សន្ទូចមួយគ្រឿងនោះ ដែលកំពុងធ្វើការលើគម្រោងផ្លូវដែកល្បឿនលឿន បានបាក់រលំ ហើយធ្លាក់លើរថភ្លើងដែលកំពុងឆ្លងកាត់ បណ្តាលឱ្យរថភ្លើងធ្លាក់ចេញពីផ្លូវ និងឆាបឆេះមួយភ្លែត ប៉ុន្តែអណ្ដាតភ្លើងត្រូវបានពន្លត់ ហើយការងារជួយសង្គ្រោះកំពុងដំណើរការ។ លោក Phiphat Ratchakitprakarn រដ្ឋមន្ត្រីក្រសួងដឹកជញ្ជូន បាននិយាយថា មានមនុស្សចំនួន ១៩៥នាក់ បានជិះនៅលើរថភ្លើងនោះ ហើយអាជ្ញាធរកំពុងប្រញាប់ប្រញាល់កំណត់អត្តសញ្ញាណអ្នកស្លាប់៕