សេចក្ដីរាយការណ៍ពីសារព័ត៌មាន South China Morning Post បានឱ្យដឹងកាលពីថ្ងៃអង្គារ (១៣ មករា) ថា រដូវកាលបោះឆ្នោតនៅប្រទេសថៃ បាននាំឱ្យមានការសន្យាផ្តល់ជូនជាសាច់ប្រាក់យ៉ាងច្រើនសន្ធឹកសន្ធាប់ ពីបណ្ដាគណបក្សដែលប្រកួតប្រជែងរកសំឡេងឆ្នោត រាប់ចាប់ពីការឱ្យប្រាក់ចំនួន ២ពាន់ដុល្លារអាមេរិក សម្រាប់ទារកទើបនឹងកើត រហូតដល់ការលុបបំណុលទាំងស្រុង និងការបន្ថែមប្រាក់ខែចំនួន ១០០ដុល្លារអាមេរិក ជារៀងរាល់ខែសម្រាប់គ្រួសារក្រីក្របំផុតទៀតផង។

ប៉ុន្តែក្រុមសេដ្ឋវិទូបានព្រមានថា នៅក្នុងសេដ្ឋកិច្ចដែលកំពុងធ្លាក់ចុះស្រាប់ទៅហើយ និងពោរពេញដោយបំណុល ក៏ស្របពេលភាពជាប់គាំងផ្នែកនយោបាយផងដែរនោះ ការសន្យាដ៏ថ្លៃថ្លាបែបនេះទំនងជាមិនអាចស្តារកំណើនឡើងវិញបានទេ។

ជនជាតិថៃជាច្រើន បានប្រាប់ប្រព័ន្ធផ្សព្វផ្សាយថា ខ្លួនយល់ឃើញថា ការចែកអំណោយទាំងនេះ ជាការបង្វែរអារម្មណ៍ពីបញ្ហាដ៏ជ្រៅ ដែលកំពុងប៉ះពាល់ដល់សេដ្ឋកិច្ចថៃ។ ការខកចិត្តរបស់ពលរដ្ឋឆ្លុះបញ្ចាំងពីស្ថានភាពមិនស្រួលកាន់តែទូលំទូលាយ ដែលអាចជះឥទ្ធិពលដល់សន្លឹកឆ្នោតរបស់មនុស្សរាប់លាននាក់ នៅក្នុងការបោះឆ្នោតថ្ងៃទី ៨ ខែកុម្ភៈ ខាងមុខនេះ។

យោងតាមអ្នកព្យាករនៅមជ្ឈមណ្ឌលស្រាវជ្រាវសេដ្ឋកិច្ច និងពាណិជ្ជកម្ម បានឱ្យដឹងថា ថៃ ដែលធ្លាប់ជាប្រទេសមានសេដ្ឋកិច្ចលេចធ្លោនៅអាស៊ី ឥឡូវនេះ ប្រឈមនឹងហានិភ័យនៃការត្រូវបានវៀតណាមវ៉ាដាច់ ក្នុងរយៈពេល ១ទសវត្សរ៍។ ក្រុមសេដ្ឋវិទូបាននិយាយថា ប្រទេសថៃត្រូវការស្ថិរភាពបន្ថែមទៀត ជាជាងការសន្យាផ្ដល់ប្រាក់ដើម្បីគេចវេះពីភាពជាប់គាំងបែបនេះ៕