អ្នកនាំពាក្យរបស់មូលនិធិកុមារអង្គការសហប្រជាជាតិ (UNICEF) បាននិយាយកាលពីថ្ងៃអង្គារថា កុមារជាង ១០០នាក់ ត្រូវបានសម្លាប់ នៅក្នុងតំបន់ហ្កាហ្សា ចាប់តាំងពីបទឈប់បាញ់បានចូលជាធរមាន ក្នុងខែតុលា ឆ្នាំ ២០២៥។

លោក James Elder បានប្រាប់អ្នកយកព័ត៌មាននៅក្នុងសន្និសីទសារព័ត៌មានរបស់UN តាមរយៈតំណភ្ជាប់វីដេអូពីតំបន់ហ្កាហ្សាថា ទីភ្នាក់ងារនេះ បានកត់ត្រារបាយការណ៍អំពីក្មេងប្រុសយ៉ាងហោចណាស់ ៦០នាក់ និងក្មេងស្រី ៤០នាក់ ដែលត្រូវបានសម្លាប់ នៅក្នុងតំបន់ហ្កាហ្សា ចាប់តាំងពីមានបទឈប់     បាញ់។

លោកបានបន្ថែមថា៖«ការរស់រានមានជីវិត នៅតែមានលក្ខខណ្ឌ។ ខណៈពេលដែលការទម្លាក់គ្រាប់បែក និងការបាញ់ប្រហារ បានថយចុះ ក្នុងអំឡុងពេលបទឈប់បាញ់ ពួកវាមិនត្រូវបានបញ្ឈប់ទេ»។

លោក Elder បាននិយាយថា តួលេខនេះ រួមបញ្ចូលតែឧប្បត្តិហេតុ ដែលមានព័ត៌មានលម្អិតគ្រប់គ្រាន់ដើម្បីកត់ត្រា ដូច្នេះចំនួនពិតប្រាកដរបស់កុមារប៉ាឡេស្ទីនដែលត្រូវបានសម្លាប់ ត្រូវបានគេរំពឹងថា នឹងខ្ពស់ជាងនេះ ដោយបន្ថែមថា កុមាររាប់រយនាក់ បានរងរបួស។

ខណៈពេលដែលព្រមានថា សង្គ្រាមរយៈពេលពីរឆ្នាំ បានធ្វើឲ្យជីវិតរបស់កុមារនៅតំបន់ហ្កាហ្សាជួបការលំបាកមិនអាចនឹកស្មានដល់ លោក Elder បានអំពាវនាវឲ្យបើកផ្លូវឲ្យជំនួយចូល និងពង្រីកការជម្លៀសផ្នែកវេជ្ជសាស្រ្តឲ្យបានកាន់តែច្រើន។

អ៊ីស្រាអែលបានធ្វើការវាយប្រហារស្ទើរតែរាល់ថ្ងៃ នៅក្នុងតំបន់ហ្កាហ្សា ចាប់តាំងពីបទឈប់បាញ់ដ៏ផុយស្រួយ បានចូលជាធរមាន ក្នុងអំឡុងពេលដែលអាជ្ញាធរសុខាភិបាលហ្កាហ្សា បានរាយការណ៍ពីការស្លាប់របស់ជនជាតិប៉ាឡេស្ទីនជាង ៤០០នាក់៕