ប្រធានាធិបតីអាមេរិក លោក Donald Trump បានព្រមានកាលពីថ្ងៃអង្គារ (១៣ មករា) ថា «ការដាក់ទោស និងការដាក់ទណ្ឌកម្ម» នឹងទៅដល់រដ្ឋ Minnesot របស់សហរដ្ឋអាមេរិក ខណៈការតវ៉ានៅតែបន្ត ជុំវិញការបាញ់សម្លាប់ស្ត្រីម្នាក់ដោយភ្នាក់ងារអនុវត្តច្បាប់អន្តោប្រវេសន៍ និងគយ ICE និងស្របពេលដែលថ្នាក់ដឹកនាំរដ្ឋ បន្តចាត់វិធានការផ្លូវច្បាប់ប្រឆាំងនឹងអាជ្ញាធរសហព័ន្ធ។

ក្នុងការបង្ហោះមួយលើវេទិកាសង្គម លោក Trump បានអះអាងថា ឧក្រិដ្ឋកម្មបានធ្លាក់ចុះគ្រប់ទីកន្លែងដែលលោកបានបញ្ជូនភ្នាក់ងារសហព័ន្ធ ដោយចោទប្រកាន់សមាជិកបក្សប្រជាធិបតេយ្យនៅរដ្ឋ Minnesota ថាបានកេងចំណេញលើភាពចលាចល ដើម្បីផលប្រយោជន៍នយោបាយ។ លោក Trump បានសរសេរទៀតថា «កុំខ្លាចអី ប្រជាជនដ៏អស្ចារ្យនៃរដ្ឋ Minnesota ថ្ងៃនៃការដាក់ទោស និងការដាក់ទណ្ឌកម្មជិតទៅដល់ហើយ!» ដោយមិនបានបញ្ជាក់ពីទម្រង់នៃសកម្មភាពអ្វីនោះទេ។

ការព្រមាននេះបានកើតឡើងបន្ទាប់ពីរដ្ឋ Minnesota និងទីក្រុងធំបំផុតទាំងពីររបស់ខ្លួនគឺក្រុង Minneapolis និង St. Paul បានដាក់ពាក្យបណ្តឹងកាលពីថ្ងៃចន្ទ ប្រឆាំងនឹងក្រសួងសន្តិសុខមាតុភូមិ ដែលជាក្រសួងមេរបស់ទីភ្នាក់ងារ ICE ដោយទាមទារឱ្យបញ្ឈប់នូវអ្វីដែលពួកគេពិពណ៌នាថាជា «ការឈ្លានពានរបស់សហព័ន្ធ» លើរដ្ឋ។

បណ្តឹងនេះជំទាស់នឹងការដាក់ពង្រាយភ្នាក់ងារសហព័ន្ធជាង ២.០០០នាក់ ដោយហៅសកម្មភាពនេះថា មិនធ្លាប់មានពីមុនមកនោះទេ និងមិនស្របតាមរដ្ឋធម្មនុញ្ញសហរដ្ឋអាមេរិកនោះឡើយ។ ជាមួយគ្នានេះ ការតវ៉ាប្រចាំថ្ងៃ នៅតែបន្តនៅទូទាំងរដ្ឋ ចាប់តាំងពីការស្លាប់របស់ស្រ្តីវ័យ ៣៧ឆ្នាំ ឈ្មោះ Renee Nicole Good នៅថ្ងៃទី៧ ខែមករា សប្ដាហ៍មុន អំឡុងប្រតិបត្តិការអនុវត្តច្បាប់នៅទីក្រុង Minneapolis៕