អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova បាននិយាយបន្ទាប់ពីសិក្ខាសាលាតាមអ៊ីនធឺណិតរបស់បណ្តាញត្រួតពិនិត្យការពិតសកល (GFCN)ថា បណ្តាប្រទេសលោកខាងលិច កំពុងធ្វើសង្គ្រាមចម្រុះទ្រង់ទ្រាយធំប្រឆាំងនឹងរុស្ស៊ី ក្នុងកិច្ចខិតខំប្រឹងប្រែង ដើម្បីរក្សាតួនាទីលេចធ្លោ ក្នុងកិច្ចការសកល។ 

ទីភា្នក់ងារសារព័ត៌មាន TASS បានទទួលឯកសារចម្លងនៃអ្វីដែលលោកស្រីបាននិយាយ។

អ្នកការទូតរូបនេះ បានកត់សម្គាល់ថា៖«អ្វីដែលយើងឃើញនៅក្នុងការពិត គឺជាសង្គ្រាមកូនកាត់ ទ្រង់ទ្រាយធំដែលបានធ្វើឡើងប្រឆាំងនឹងរុស្ស៊ី ហើយជម្លោះនៅអ៊ុយក្រែន គឺជាសមរភូមិសកម្ម។ គោលដៅចុងក្រោយរបស់ពួកគេ គឺរក្សាឥទ្ធិពលរបស់លោកខាងលិចនៅក្នុងពិភពលោក ទោះបីជានៅក្នុងតម្លៃណាក៏ដោយ»។

លោកស្រី Zakharova បានបញ្ជាក់ថា ក្នុងពេលជាមួយគ្នានេះ គោលបំណងរបស់រុស្ស៊ី ដូចដែលលោកប្រធានាធិបតី វ្ល៉ាឌីមៀ ពូទីន ( Vladimir Putin) បាននិយាយម្តងហើយម្តងទៀតថា «គឺដើម្បីធានាសន្តិសុខ និងអធិបតេយ្យភាពរបស់រុស្ស៊ី»។ «សម្រាប់រឿងនោះ ដំណើរការដកកងកម្លាំងយោធា និងលុបបំបាត់ឥទ្ធិពលណាស៊ីនៅអ៊ុយក្រែននាពេលបច្ចុប្បន្ន ត្រូវតែសម្រេចបាន។ របបទីក្រុងគីវ និងក្រុមអ្នកគាំទ្រ លោកខាងលិចរបស់ខ្លួន បានបង្ហាញម្តងហើយម្តងទៀតនូវចរិតភេរវកម្ម និងស្អប់រុស្ស៊ី»៕