រដ្ឋាភិបាលអ៊ីរ៉ង់ កាលពីថ្ងៃអង្គារ (ទី១៣ ខែមករា ឆ្នាំ២០២៦) បានចោទប្រកាន់សហរដ្ឋអាមេរិកថា កំពុងប្រឹងប្រែងរកលេស ដើម្បីធ្វើអន្តរាគមន៍យោធា បន្ទាប់ពីប្រធានាធិបតីអាមេរិក លោក Donald Trump បានគំរាមកំហែង «ចាត់វិធានការខ្លាំងក្លា» ពាក់ព័ន្ធនឹងការបង្ក្រាបលើការតវ៉ាដ៏ធំ ដែលបណ្ដាលឲ្យមានមនុស្សស្លាប់យ៉ាងច្រើន។

អមដោយការលើកឡើង ដែលថា «យុទ្ធសាស្ត្រ» របស់ទីក្រុងវ៉ាស៊ីនតោន នឹងជួបជាមួយ «ការបរាជ័យម្តងទៀត» នោះ បេសកម្មរបស់អ៊ីរ៉ង់ ប្រចាំនៅអង្គការសហប្រជាជាតិ (UN) បានបង្ហោះនៅលើបណ្ដាញសង្គម X ថា៖ «បំណងប្រាថ្នា និងគោលនយោបាយរបស់សហរដ្ឋអាមេរិក ចំពោះអ៊ីរ៉ង់ គឺចង់ផ្លាស់ប្តូររបបរបស់ប្រទេស ដោយដាក់ទណ្ឌកម្ម ចេញការគំរាមកំហែង ហើយបង្កឲ្យមានភាពចលាចល និងភាពវឹកវរ ដោយទាំងអស់នេះ គឺជាមធ្យោបាយ ដើម្បីរកលេសធ្វើអន្តរាគមន៍យោធា»។

លោកប្រធានាធិបតី Donald Trump បាននិយាយកាលពីថ្ងៃអង្គារថា សហរដ្ឋអាមេរិក នឹងមានវិធានការតបយ៉ាងខ្លាំងក្លា ប្រសិនបើអាជ្ញាធរ នៅអ៊ីរ៉ង់ ចាប់ផ្តើមសម្លាប់មនុស្សដោយព្យួរ-ក អំឡុងការបង្ក្រាបរបស់ពួកគេ លើការបះបោររបស់ប្រជាជន ប្រឆាំងនឹងរដ្ឋាភិបាល។

នៅពេលត្រូវបានសួរ អំពីការសម្លាប់ដោយព្យួរ-ក ដែលអាចចាប់ផ្តើមនៅថ្ងៃពុធនេះនោះ លោកបានប្រាប់ប្រព័ន្ធផ្សព្វផ្សាយ CBS News ក្នុងបទសម្ភាសន៍មួយថា៖ «យើងនឹងចាត់វិធានការយ៉ាងខ្លាំងក្លា ប្រសិនបើពួកគេធ្វើរឿងបែបនេះ»។ តាមរយៈវីដេអូឃ្លីបមួយដែលចេញផ្សាយតាមប្រព័ន្ធអ៊ីនធឺណិត លោក Trump បានបញ្ជាក់ថា៖ «នៅពេលដែលពួកគេចាប់ផ្តើមសម្លាប់មនុស្សរាប់ពាន់នាក់ ហើយឥឡូវនេះ អ្នកកំពុងប្រាប់ខ្ញុំអំពីការព្យួរ-ក។ យើងនឹងឃើញថា តើពួកគេ នឹងជួបជាមួយវិធានការអ្វី»។

គួរបញ្ជាក់ថា បើយោងតាមក្រុមសិទ្ធិមនុស្សមួយ បានឲ្យដឹងថា មនុស្សជាង ២.០០០នាក់ហើយ ត្រូវបានសម្លាប់ អំឡុងការបង្ក្រាបដោយហិង្សារបស់កងកម្លាំងសន្តិសុខ លើការតវ៉ានៅក្នុងប្រទេសអ៊ីរ៉ង់នេះ៕