ភ្នំពេញ ៖ ពាក់ព័ន្ធនឹងការបោះជំរំយុវជនជាសកលលើកទី១១ឆ្នាំនេះ គឺប្រតិភូយុវជនបោះជំរំជាសកលលើកទី១១ បានចាប់ផ្តើមធ្វើសកម្មភាពក្នុងជំរំហើយ ដើម្បីលត់ដំជីវិតនៅជើងភ្នំគូលែន ក្នុងការដុះខាត់ដើម្បីអភិវឌ្ឍន៍ខ្លួន និងធ្វើប្រទេសជាតិឱ្យកាន់តែរីកចម្រើននៅថ្ងៃខាងមុខ។

បញ្ជាក់ប្រាប់បាយ័នព្រឹកនេះ លោក រស់ ភារៈ ក្រុមការងាររៀបចំកម្មវិធីបោះជំរំយុវជាសកលលើកទី១១ បានប្រាប់ថា ពេលនេះប្រតិភូបោះជំរំ បានមកដល់ទីតំាងដោយសុវត្ថិភាព ហើយនឹងមានកម្មវិធីជាច្រើន ដើម្បីអភិវឌ្ឍសមត្ថភាព ជំរុញការយល់ដឹងអំពីវប្បធម៌ និងបណ្តុះបណ្តាលយុវជនឱ្យក្លាយជាអ្នកចូលរួមយ៉ាងសកម្មក្នុងការថែរក្សា និងអភិរក្សបេតិកភណ្ឌវប្បធម៌ជាតិ ដើម្បីបង្កើនការផ្សព្វផ្សាយទេសចរណ៍ និងលើកកម្ពស់កិត្តិនាមរបស់ព្រះរាជាណាចក្រកម្ពុជា។

ចំណែកយុវជនបោះជំរំចំនួន៣រូប បានប្រាប់ដែរថា ពួកគេបានមកដល់ទីតាំងបោះជំរំដោយសុវត្ថិភាព សូមឪពុកម្តាយ កុំព្រួយបារម្ភ ហើយពួកគេ កំពុងចូលរួមធ្វើសកម្មភាពក្នុងជំរំ ហើយប្តេជ្ញាចិត្ត នឹងខិតខំដុះខាត់ជីវិតនៅទីនេះឱ្យទទួលបាននូវបំណិនគ្រប់ប្រភេទ ដើម្បីចូលរួមយកទៅអភិវឌ្ឍប្រទេសជាតិនៅខាងមុខ។

 សូមបញ្ជាក់ថា កម្មវិធីបោះជំរំយុវជនជាសកលលើកទី១១ឆ្នាំនេះ ស្ថិតក្រោមប្រធានបទ យុវជន និងការអប់រំនៅកម្ពុជាឆ្នាំ២០៣០ ហើយការបោះជំរំយុវជនជាសកលលើកទី១១ នេះ ស្ថិតក្នុងបរិបទដែលត្រូវបន្តអភិវឌ្ឍ និងជំរុញសមត្ថភាពយុវជន ឱ្យចូលរួមអនុវត្តផែនទីបង្ហាញផ្លូវ ការអប់រំកម្ពុជាឆ្នាំ២០៣០ ដើម្បីសម្រេចនូវគោលដៅអភិវឌ្ឍន៍ប្រកបដោយចីរភាពឆ្នាំ២០៣០ ក៏ដូចជាចូលរួមលើកស្ទួយការអប់រំ ផ្សព្វផ្សាយទេសចរណ៍ វប្បធម៌ អរិយធម៌ របស់ព្រះរាជាណាចក្រកម្ពុជាក្រោមការដឹកនាំប្រកបដោយភាពប៉ិនប្រសព្វរបស់ សម្តេចមហាបវរធិបតី ហ៊ុន   ម៉ាណែត នាយករដ្ឋមន្រ្ដី និងដើម្បីលើកទឹកចិត្តដល់យុវជនក្នុងកិច្ចខិតខំប្រឹងប្រែងអភិរក្សបេតិកភណ្ឌ និងលើកកម្ពស់ការយល់ដឹងដល់យុវជនអំពីសារៈសំខាន់នៃការថែរក្សាសម្បត្តិបេតិកភណ្ឌវប្បធម៌ជាតិ តាមរយៈការចូលរួមក្នុងកម្មវិធី យុវជននឹងទទួលបាននូវបទពិសោធថ្មី មានទំនាក់ទំនងជាមួយយុវជនមកពីមជ្ឈដ្ឋានផ្សេងៗ បណ្តុះស្មារតីដល់យុវជនក្នុងការថែរក្សាមរតកជាតិ ចូលរួមលើកស្ទួយនិងផ្សព្វផ្សាយវិស័យទេសចរណ៍ វប្បធម៌ និងបំណិនជីវិតដល់  យុវជនក្នុងយុគ្គសម័យរីកចម្រើន ពិសេសត្រូវឱ្យយុវជនរៀនរស់នៅដោយខ្លួនឯងឆ្ងាយពីគ្រួសារ។

ផលិត គង់ រ៉េន