រដ្ឋមន្ត្រីការបរទេសចក្រភពអង់គ្លេស នឹងទៅបំពេញទស្សនកិច្ចនៅប្រទេសហ្វាំងឡង់ និងន័រវ៉ែស នៅថ្ងៃពុធ (ទី១៤ ខែមករា ឆ្នាំ២០២៦) នេះ ជាកន្លែងដែលលោកស្រីនឹងអំពាវនាវឲ្យអង្គការណាតូ (NATO) បង្កើនការងាររបស់ខ្លួន នៅក្នុងតំបន់អាក់ទិក ដើម្បីការពារផលប្រយោជន៍ក្នុងតំបន់នេះទល់នឹងរុស្ស៊ី។

ដំណើរទស្សនកិច្ចទៅកាន់តំបន់អាក់ទិករបស់លោកស្រី Yvette Cooper ធ្វើឡើងបន្ទាប់ពីមានការគំរាមកំហែងឡើងវិញ ដោយប្រធានាធិបតីអាមេរិក លោក Donald Trump ក្នុងការដណ្តើមកាន់កាប់ដែនដី Greenland ដែលជាទឹកដីស្វយ័តរបស់ព្រះរាជាណាចក្រដាណឺម៉ាក។ រដ្ឋមន្ត្រីការបរទេសដាណឺម៉ាក និងកោះ Greenland នឹងជួបជាមួយអនុប្រធានាធិបតីអាមេរិក លោក JD Vance និងរដ្ឋមន្ត្រីការបរទេស លោក Marco Rubio នៅថ្ងៃពុធនេះ។

នាយករដ្ឋមន្ត្រីអង់គ្លេស លោក Keir Starmer បានបញ្ជាក់ថា លោកឈរជាមួយប្រទេសដាណឺម៉ាក ក្នុងការការពារដែនដី Greenland។ ដំណើរទស្សនកិច្ចរបស់លោកស្រី Cooper នឹងផ្តោតលើរុស្ស៊ី ដែលក្រសួងការបរទេស បានពិពណ៌នានៅក្នុងសេចក្តីថ្លែងការណ៍មួយថា ជា «ការគំរាមកំហែងដ៏ធំបំផុត» ចំពោះសន្តិសុខតំបន់អាក់ទិក។

ហើយនៅប្រទេសហ្វាំងឡង់ លោកស្រី Cooper នឹងជួបជាមួយឆ្មាំព្រំដែនដែលការពារព្រំដែនប៉ែកខាងកើតរបស់អង្គការណាតូជាមួយរុស្ស៊ី ខណៈដែលនៅន័រវ៉ែស លោកស្រីនឹងទៅមើលកងម៉ារីនដែលចូលរួមក្នុងសមយុទ្ធហ្វឹកហាត់បាញ់គ្រប់ពិត។

បើយោងតាមក្រសួងការបរទេសអង់គ្លេស បានឲ្យដឹងថា តំបន់ចុងភាគខាងជើង ដែលរួមមានកោះ Greenland ដែរនោះ គឺជាទីតាំងនៃផ្លូវដឹកជញ្ជូនដ៏ធំ និងហេដ្ឋារចនាសម្ព័ន្ធសំខាន់ៗ ដូចជាខ្សែកាបក្រោមសមុទ្រជាដើម ដែលធ្វើឲ្យតំបន់នេះមានសារៈសំខាន់ ចំពោះសន្តិសុខរបស់ចក្រភពអង់គ្លេស៕