ទីភ្នាក់ងារសារព័ត៌មានពាក់កណ្តាលផ្លូវការ Fars បានរាយការណ៍កាលពីថ្ងៃអង្គារថា កងកម្លាំងស៊ើបការណ៍សម្ងាត់អ៊ីរ៉ង់ បានចាប់ខ្លួន «ភេរវករជាច្រើននាក់» ដែលមានទំនាក់ទំនងជាមួយអ៊ីស្រាអែល នៅក្នុងខេត្ត Sistan និង Baluchestan ភាគអាគ្នេយ៍។

យោងតាមរបាយការណ៍បានឲ្យដឹងថា «ក្រុមភេរវករ» ដែលត្រូវបានបណ្តុះបណ្តាលក្នុងការអនុវត្តប្រតិបត្តិការភេរវកម្ម និងបំផ្លិចបំផ្លាញ បានចូលទៅក្នុងប្រទេសអ៊ីរ៉ង់ តាមរយៈព្រំដែនភាគខាងកើត ហើយត្រូវបានដាក់ពង្រាយនៅក្នុងផ្ទះចំនួន ៧ នៅក្នុងរដ្ឋធានី Zahedan របស់ខេត្តនេះ។

របាយការណ៍នេះបានបញ្ជាក់ថា អាវុធ និងគ្រឿងផ្ទុះផលិតនៅសហរដ្ឋអាមេរិកផ្សេងៗគ្នា ត្រូវបានរឹបអូសពីពួកគេ ដោយមិនបានផ្តល់នូវចំនួនពិតប្រាកដនៃអ្នកដែលត្រូវបានចាប់ខ្លួននោះទេ។

កាលពីថ្ងៃចន្ទ ក្រសួងស៊ើបការណ៍សម្ងាត់អ៊ីរ៉ង់ បាននិយាយនៅក្នុងសេចក្តីថ្លែងការណ៍មួយថា កងកម្លាំងរបស់ខ្លួនបានឃាត់ខ្លួន « ភេរវករជាង ៤០នាក់» ដែលមានទំនាក់ទំនងជាមួយសហរដ្ឋអាមេរិក និងអ៊ីស្រាអែល នៅក្នុងខេត្ត Kerman, Tehran, West Azarbaijan និង Lorestan ក្នុងអំឡុងពេល «កុបកម្ម» ថ្មីៗនេះ នៅក្នុងប្រទេសនេះ ហើយបានរឹបអូសអាវុធ និងសម្ភារៈផ្ទុះមួយចំនួនធំពីពួកគេ។

ការវិវត្តនេះ បានកើតឡើង ខណៈដែលការតវ៉ាបានផ្ទុះឡើងនៅក្នុងទីក្រុងជាច្រើនរបស់អ៊ីរ៉ង់ ចាប់តាំងពីថ្ងៃទី ២៨ ខែធ្នូ។ ដំបូងឡើយ ពួកគេបានចាប់ផ្តើមជាមួយនឹងអាជីវករផ្សារតេអេរ៉ង់ ដែលធ្វើបាតុកម្មប្រឆាំងនឹងការធ្លាក់ចុះយ៉ាងខ្លាំងនៃរូបិយប័ណ្ណរីអាល់ជាតិ និងអតិផរណាកើនឡើង មុនពេលរាលដាលដល់ទីក្រុងដទៃទៀត។ ភាពចលាចលនេះ បាននាំឲ្យមានអ្នកស្លាប់ និងរងរបួស ក្នុងចំណោមកងកម្លាំងសន្តិសុខ និងជនស៊ីវិល៕