ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃអង្គារថា មនុស្ស ៤នាក់ ត្រូវបានសម្លាប់ និងយ៉ាងហោចណាស់ ១៧ នាក់ រងរបួស នៅក្នុងការវាយប្រហារដោយកងកម្លាំងដឹកនាំដោយឃើដ នៅក្នុងទីក្រុងធំទី២ របស់ប្រទេសស៊ីរី។  

ក្រសួងការពារជាតិស៊ីរី បាននិយាយថា ការប៉ះទង្គិចគ្នានេះ បានកើតឡើងបីថ្ងៃជាប់ៗគ្នា ដែលកងកម្លាំងប្រជាធិបតេយ្យស៊ីរី បានវាយប្រហារលើគោលដៅនៅក្នុងទីក្រុងអាឡេប៉ូ និងខេត្តជុំវិញនោះ។

សារព័ត៌មាន SANA បានរាយការណ៍ថា ស្ត្រីពីរនាក់ និងបុរសម្នាក់ បានស្លាប់ បន្ទាប់ពីកងកម្លាំងប្រជាធិបតេ្យស៊ីរី ( SDF) បានបាញ់ផ្លោងទៅលើអគារលំនៅឋាន នៅក្នុង និងជុំវិញសង្កាត់ Al-Midan នៃទីក្រុងអាឡេប៉ូ។

នាយកដ្ឋានកសិកម្មអាឡេប៉ូ បាននិយាយថា បុគ្គលិក ៩នាក់របស់ខ្លួន ត្រូវបានបញ្ជូនទៅមន្ទីរពេទ្យ បន្ទាប់ពីអគាររបស់ខ្លួននៅក្នុងតំបន់នោះ ត្រូវរងការវាយប្រហារដោយគ្រាប់ផ្លោងរបស់ SDF។

របាយការណ៍បានបញ្ជាក់ថា ប្រជាពលរដ្ឋមួយចំនួននៅក្នុងតំបន់នោះ បានភៀសខ្លួនទៅកាន់តំបន់ដែលមានសុវត្ថិភាពជាងនៅក្នុងទីក្រុងនេះ ដោយអាជ្ញាធរជំរុញឲ្យប្រជាជនជៀសវាងតំបន់ដែលមានការប៉ះទង្គិចគ្នា បានបន្ត រហូតដល់ត្រូវបានធានាសុវត្ថិភាពដោយកងកម្លាំងសន្តិសុខ៕