អ្នកក្រុងបាងកក បានភ្ញាក់ពីដំណេកមកជួបនឹងផ្ទៃមេឃពេញដោយអ័ព្ទ និងការបំពុល នៅថ្ងៃពុធ (ទី១៤ ខែមករា ឆ្នាំ២០២៦) នេះ ដោយអាជ្ញាធរបានជំរុញឲ្យប្រជាជននៅក្នុងមជ្ឈមណ្ឌលពាណិជ្ជកម្ម និងហិរញ្ញវត្ថុសំខាន់ៗរបស់ទីក្រុងនេះស្នាក់នៅក្នុងផ្ទះ។

កម្រិតនៃការបំពុលភាគល្អិតក្នុងខ្យល់ បានកើនឡើងដល់ប្រភេទអាក្រក់បំផុត នៅលើសន្ទស្សន៍គុណភាពខ្យល់របស់ទីក្រុងបាងកក ក្នុងតំបន់ Bang Rak, Pathum Wan និង Sathon ដែលជាទីតាំងនៃទីស្នាក់ការកណ្តាលអន្តរជាតិ ស្ថានទូត និងផ្សារទំនើបធំៗមួយចំនួនរបស់រាជធានីរបស់ថៃ។

បើយោងតាម IQAir ដែលជាក្រុមហ៊ុនបច្ចេកវិទ្យាគុណភាពខ្យល់របស់ប្រទេសស្វីស បានឲ្យដឹងថា ការកើនឡើងនូវកម្រិតកំហាប់ភាគល្អិតនិចល PM2.5 ជាភាគល្អិតតូចៗដែលអាចជ្រាបចូលទៅក្នុងសួតបានយ៉ាងជ្រៅ បានរុញឲ្យទីក្រុងបាងកកដែលមានប្រជាជនប្រហែល ១០លាននាក់ ស្ថិតក្នុងលំដាប់ទី១២ ក្នុងចំណោមទីក្រុងធំៗដែលមានការបំពុលច្រើនបំផុតរបស់ពិភពលោក នាព្រឹកថ្ងៃទី១៤ ខែមករានេះ។

ជារៀងរាល់ឆ្នាំ ផ្សែងអ័ព្ទបានក្លាយជាអាសន្នសុខភាពសាធារណៈរបស់ទីក្រុងបាងកក អំឡុងខែត្រជាក់។ ការកើនឡើងកម្រិតការបំពុលនេះត្រូវបានជំរុញដោយផ្សែងចរាចរណ៍យានយន្ត ការបំភាយឧស្ម័នឧស្សាហកម្ម ធូលីសំណង់ និងការដុតកសិកម្មពីបណ្ដាតំបន់ជិតខាង ដោយធ្វើឲ្យទីក្រុងនេះបន្តមានបរិយាកាសអាក្រក់៕