យោធាអ៊ីស្រាអែលបានឲ្យដឹងនៅថ្ងៃពុធ (ទី១៤ ខែមករា ឆ្នាំ២០២៦) នេះថា ខ្លួនបានសម្លាប់សមាជិកក្រុមសកម្មប្រយុទ្ធចំនួន ៦នាក់ ដែលជាចំនួនអ្នកស្លាប់ធ្វើបច្ចុប្បន្នភាពចុងក្រោយ ពីការបាញ់ប្រហារតគ្នា នៅតំបន់ហ្កាហ្សា កាលពីមួយថ្ងៃមុននេះ ដោយបានចោទប្រកាន់ជនទាំងនោះថា បានរំលោភលើបទឈប់បាញ់ នៅក្នុងដែនដីនោះ។

កាលពីល្ងាចថ្ងៃអង្គារ យោធាបានឲ្យដឹងនៅក្នុងសេចក្តីថ្លែងការណ៍មួយថា ខ្លួនបានសម្លាប់សមាជិករបស់ក្រុមសកម្មប្រយុទ្ធ ២នាក់ ក្នុងចំណោម ៦នាក់ដែលខ្លួនបានកំណត់អត្តសញ្ញាណនៅក្បែរកងទ័ពរបស់ខ្លួននៅភាគខាងលិចទីក្រុង Rafah ហើយថា កងរថក្រោះបានបាញ់ប្រហារពួកគេ។

សេចក្ដីថ្លែងការណ៍នោះ បានឲ្យដឹងទៀតថា ជនទាំងនោះត្រូវបានសម្លាប់នៅក្នុងការបាញ់ប្រហារតគ្នាជាបន្តបន្ទាប់ ក្នុងនោះរួមទាំងការវាយប្រហារតាមអាកាស ខណៈពេលដែលកងទ័ពបន្តស្វែងរកអ្នកផ្សេងទៀត។

តែនៅក្នុងសេចក្តីថ្លែងការណ៍មួយនាថ្ងៃពុធនេះ យោធាបានឲ្យដឹងថា៖ «បន្ទាប់ពីការស្វែងរកដែលត្រូវបានធ្វើឡើងនៅក្នុងតំបន់នេះ ឥឡូវនេះ វាត្រូវបានបញ្ជាក់ថា កងទ័ពកម្ចាត់ពួកភេរវករទាំង ៦នាក់បានហើយ អំឡុងការបាញ់ប្រហារតគ្នា»។

យោធាបានបន្ថែមថា វត្តមានរបស់ពួកសកម្មប្រយុទ្ធ នៅក្បែរនឹងទីតាំងកងទ័ព និងឧប្បត្តិហេតុជាបន្តបន្ទាប់ គឺជា «ការរំលោភបំពានយ៉ាងច្បាស់ក្រឡែតលើកិច្ចព្រមព្រៀងឈប់បាញ់»។ ប្រភពសន្តិសុខមួយនៅតំបន់ហ្កាហ្សា បានរាយការណ៍កាលពីល្ងាចថ្ងៃអង្គារថា កងកម្លាំងអ៊ីស្រាអែលបាន «បើកការបាញ់ប្រហារ នៅភាគខាងលិចនៃទីក្រុង Rafah»។

ក្រោមបទឈប់បាញ់ដែលបានចូលជាធរមាន កាលពីខែតុលាឆ្នាំមុន បន្ទាប់ពីផ្ទុះសង្គ្រាមរយៈពេល ២ឆ្នាំ រវាងអ៊ីស្រាអែល និងក្រុមហាម៉ាស កងកម្លាំងអ៊ីស្រាអែល នៅតំបន់ហ្កាហ្សា បានដកទៅកាន់ទីតាំងនៅពីក្រោយព្រំដែន ដែលគេស្គាល់ថា ជា «ខ្សែបន្ទាត់ពណ៌លឿង» ពោលគឺជាខ្សែព្រំដែនស្ថិតក្រោមការគ្រប់គ្រងរបស់កងទ័ពអ៊ីស្រាអែល៕