ក្រុមហ៊ុនពាក់ព័ន្ធនិយាយថា យានដ្រូនបានវាយប្រហារនាវាដឹកប្រេង ២គ្រឿងនៅក្នុងសមុទ្រខ្មៅកាលពីថ្ងៃអង្គារ រួមទាំងនាវាមួយគ្រឿងជួលដោយក្រុមហ៊ុនប្រេងធំ Chevron របស់សហរដ្ឋអាមេរិក ពេលដែលពួកគេធ្វើដំណើរទៅកាន់ចំណតនៅតំបន់ឆ្នេរប្រទេសរុស្ស៊ី ។

យោងតាមប្រភពចំនួន ៨ ដែលសុំមិនបញ្ចេញឈ្មោះ បានឲ្យដឹងថា នាវាទាំង ២គ្រឿងនេះ ធ្វើដំណើរតាមផ្លូវទៅកាន់ចំណត Yuzhnaya Ozereyevka គឺជាចំណុចផ្ទុកប្រេងប្រហែល ៨០ភាគរយរបស់កាហ្សាក់ស្ថានដែលមានគោលដៅទៅកាន់ទីផ្សារអន្តរជាតិ ក៏ដូចជាប្រេងឆៅមួយចំនួនរបស់រុស្ស៊ី ។

ការវាយប្រហារនេះ កើតមានឡើង ស្របពេលទិន្នផលប្រេងកាហ្សាក់ស្ថានធ្លាក់ចុះយ៉ាងគំហុក នៅដើមខែមករានេះ ក្នុងនោះក្រុមហ៊ុនប្រេងធំៗរបស់សហរដ្ឋអាមេរិកដែលគ្របដណ្តប់វិស័យប្រេងរបស់ពួកគេ ពិបាកបូមប្រេងឆៅកាត់តាមប្រទេសរុស្ស៊ី ដោយសារព្យុះរដូវរងា និងការខូចខាតហេដ្ឋារចនាសម្ព័ន្ធបណ្តាលមកពីការវាយប្រហារយានដ្រូនអ៊ុយក្រែន ។

ទិន្នន័យនាវាចរណ៍ LSEG បង្ហាញថា នាវាមួយគ្រឿងក្នុងចំណោមនាវាដឹកប្រេងដែលរងការវាយប្រហារ គឺនាវា Delta Harmony ដែលគ្រប់គ្រងដោយក្រុមហ៊ុន Delta Tankers របស់ក្រិក ។

 នាវាមួយគ្រឿងទៀត គឺនាវា Matilda ដែលជួលដោយក្រុមហ៊ុន KazMunayGas គ្រប់គ្រងដោយក្រុមហ៊ុន Thenamaris របស់ក្រិក ត្រូវបានគេរំពឹងថានឹងផ្ទុកប្រេងកាហ្សាក់ស្ថាន ចេញពីចំណត Karachaganak ពេលដែលវារងការវាយប្រហារ ។

 សូមបញ្ជាក់ថា ទីក្រុងគីវ មានគោលដៅលើហេដ្ឋារចនាថាមពលសម្ព័ន្ធរុស្ស៊ី ដើម្បីដាក់សម្ពាធទីក្រុងមូស្គូឲ្យបញ្ចប់សង្រ្គាមរបស់ខ្លួននៅអ៊ុយក្រែន ។ ទោះបីជាយ៉ាងណាក៏ដោយ គេនៅមិនទាន់ដឹងច្បាស់ភ្លាមៗនោះទេថា តើនរណាជាអ្នកនៅពីក្រោយការវាយប្រហារលើនាវាដឹកប្រេងកាលពីថ្ងៃអង្គារ ៕