បើយោងតាមប្រភពប៉ាឡេស្ទីនចំនួន ៤រូប បានឲ្យដឹងថា ប្រធានាធិបតីអាមេរិក លោក Donald Trump នៅថ្ងៃពុធ (ទី១៤ ខែមករា ឆ្នាំ២០២៦) នេះ ត្រូវបានគេរំពឹងថា នឹងបន្តជំរុញផែនការតាមដំណាក់កាលរបស់លោក សម្រាប់អនាគតរបស់តំបន់ហ្កាហ្សា ដោយប្រកាសពីរដ្ឋបាលត្រូវគ្រប់គ្រងដែនដីប៉ាឡេស្ទីនដែលរងការបំផ្លិចបំផ្លាញដោយសារសង្គ្រាម។

ប្រទេសអ៊ីស្រាអែល និងក្រុមហាម៉ាស កាលពីខែតុលាឆ្នាំមុន បានចុះហត្ថលេខាលើផែនការ ២០ចំណុចរបស់លោក Trump ដែលកំណត់ថា ក្រុមប្រឹក្សាអ្នកជំនាញប៉ាឡេស្ទីនមួយ ត្រូវបានត្រួតពិនិត្យដោយ «ក្រុមប្រឹក្សាសន្តិភាព» អន្តរជាតិ ដែលមានន័យថា គ្រប់គ្រងតំបន់ហ្កាហ្សា សម្រាប់រយៈពេលអន្តរកាល។ ដំណើរការនោះមិនរាប់បញ្ចូលតំណាងរបស់ក្រុមហាម៉ាសឡើយ។

ប្រភពប៉ាឡេស្ទីនទាំងនេះ បានបញ្ជាក់ថា ស្ថាប័នប៉ាឡេស្ទីនដែលមានសមាជិក ១៤នាក់ នឹងដឹកនាំដោយលោក Ali Shaath អតីតអនុរដ្ឋមន្ត្រីនៅក្នុងអាជ្ញាធរប៉ាឡេស្ទីនដែលគាំទ្រដោយលោកខាងលិច និងដែលធ្លាប់ទទួលបន្ទុកការអភិវឌ្ឍតំបន់ឧស្សាហកម្ម។

សមាជិកផ្សេងទៀតដែលត្រូវបានជ្រើសរើសដោយលោក Nickolay Mladenov អតីតបេសកជនអង្គការសហប្រជាជាតិ ប្រចាំតំបន់មជ្ឈិមបូព៌ា ដែលត្រូវបានគេរំពឹងថា នឹងតំណាងឲ្យក្រុមប្រឹក្សាសន្តិភាព នៅដែនដីនេះ រួមមានបុគ្គលមកពីវិស័យឯកជន និងអង្គការមិនមែនរដ្ឋាភិបាល។ នេះបើយោងតាមបញ្ជីឈ្មោះដែលសារព័ត៌មាន Reuters ទទួលបាន។

គួរបញ្ជាក់ថា ដំណាក់កាលដំបូងនៃផែនការរបស់លោក Trump ដែលរួមមានកិច្ចព្រមព្រៀងឈប់បាញ់ និងការដោះលែងចំណាប់ថ្នូរ ត្រូវបានរង្គោះរង្គើដោយបញ្ហានានា ក្នុងនោះរួមមានទាំងការវាយប្រហារតាមអាកាសរបស់អ៊ីស្រាអែលនៅតំបន់ហ្កាហ្សា ដែលបានសម្លាប់មនុស្សរាប់រយនាក់ ការបដិសេធរបស់ក្រុមហាម៉ាស ក្នុងការរំសាយអាវុធ សាកសពរបស់ចំណាប់ថ្នូរអ៊ីស្រាអែលចុងក្រោយម្នាក់មិនទាន់ត្រូវបានប្រគល់មកវិញ និងការពន្យារពេលរបស់អ៊ីស្រាអែល ក្នុងការបើកឡើងវិញនូវច្រកព្រំដែន Rafah របស់តំបន់ហ្កាហ្សា ជាមួយអេហ្ស៊ីប៕