ប្រធានាធិបតីអាមេរិក លោក Donald Trump បាននិយាយថា ការណ៍ដែលកោះ Greenland មិនស្ថិត «នៅក្នុងដៃ» របស់សហរដ្ឋអាមេរិកនោះ គឺ «មិនអាចទទួលយកបាន» ឡើយ ដោយបញ្ជាក់ជាថ្មី អំពីការទាមទាររបស់លោក ក្នុងការគ្រប់គ្រងលើដែនដីរបស់ប្រទេសដាណឺម៉ាកមួយនេះ ពោលគឺត្រឹមតែប៉ុន្មានម៉ោង មុនមានកិច្ចប្រជុំ នៅសេតវិមាន ជុំវិញបញ្ហានេះ។

លោក Trump បានសរសេរបង្ហោះនៅលើបណ្ដាញសង្គមថា៖ «សហរដ្ឋអាមេរិកត្រូវការកោះ Greenland សម្រាប់គោលបំណងសន្តិសុខជាតិ។ វាមានសារៈសំខាន់ណាស់ សម្រាប់ប្រព័ន្ធការពារ Golden Dome ដែលយើងកំពុងបង្កើតឡើង។ អង្គការណាតូ (NATO) គួរតែជួយឲ្យយើងបានគ្រប់គ្រងវា»។

លោកបានបន្ថែមថា៖ «អង្គការណាតូនឹងកាន់តែគួរឲ្យញញើត និងកាន់តែមានប្រសិទ្ធភាព ដោយសារដែនដី Greenland ស្ថិតនៅក្នុងដៃរបស់សហរដ្ឋអាមេរិក។ អ្វីផ្សេងពីនេះ គឺមិនអាចទទួលយកបានឡើយ»។

រដ្ឋមន្ត្រីការបរទេសដាណឺម៉ាក និងកោះ Greenland នឹងជួបជាមួយអនុប្រធានាធិបតីអាមេរិក លោក J.D. Vance នៅសេតវិមាន នៅយប់ថ្ងៃទី១៤ ខែមករានេះ បន្ទាប់ពីមានការគំរាមកំហែងរបស់លោក Trump អស់រយៈពេលជាច្រើនសប្តាហ៍មកនេះ៕