អ្នកនាំពាក្យរដ្ឋាភិបាលអាល្លឺម៉ង់បានឲ្យដឹងថា ប្រទេសអាល្លឺម៉ង់បើកចំហ ចំពោះការពង្រឹងទំនាក់ទំនងជាមួយរដ្ឋាភិបាលស៊ីរីថ្មី ដោយបន្ថែមថា ទីក្រុងប៊ែរឡាំងកំពុងតាមដានយ៉ាងយកចិត្តទុកដាក់ ចំពោះស្ថានការណ៍ នៅក្នុងប្រទេសនេះ។

នៅឯសន្និសីទសារព័ត៌មានរដ្ឋាភិបាលប្រចាំថ្ងៃ អ្នកនាំពាក្យរូបនេះ បានលើកឡើងថា៖ «ពិតមែនហើយ រដ្ឋាភិបាលអាល្លឺម៉ង់ បើកចំហចំពោះការពង្រឹងទំនាក់ទំនង និងការចាប់ផ្តើមថ្មីជាមួយរដ្ឋាភិបាលស៊ីរីថ្មី»។

អ្នកនាំពាក្យរូបនេះបានបន្ថែមថា ទីក្រុងប៊ែរឡាំងកំពុងតាមដានយ៉ាងយកចិត្តទុកដាក់ ចំពោះស្ថានភាពនៅក្នុងទីក្រុង Aleppo របស់ប្រទេសស៊ីរី ជាកន្លែងដែលការប៉ះទង្គិចគ្នាដ៏អាក្រក់ បានផ្ទុះឡើងថ្មីៗនេះ ហើយក៏មានការពិគ្រោះយោបល់យ៉ាងជិតស្និទ្ធជាមួយទីក្រុងដាម៉ាសផងដែរ។

អ្នកនាំពាក្យរូបនេះបាននិយាយនៅថ្ងៃពុធ (ទី១៤ ខែមករា ឆ្នាំ២០២៦) នេះថា៖ «ស្ថានការណ៍ នៅក្នុងប្រទេសស៊ីរី គឺដូចជាត្រូវការវាយតម្លៃស្ទើរតែរាល់ថ្ងៃ។ ខ្ញុំមិនចង់ផ្តល់ការវាយតម្លៃថ្មី អំពីស្ថានភាពជាក់លាក់ណាមួយនៅពេលនេះនោះទេ។ ប៉ុន្តែខ្ញុំគិតថា យើងនឹងមានឱកាសពិភាក្សាអំពីរឿងនេះឲ្យបានលម្អិតបន្ថែមទៀត នៅក្នុងរយៈពេលប៉ុន្មានថ្ងៃខាងមុខ»។

ដោយដកស្រង់ប្រភពសន្តិសុខ និងរដ្ឋាភិបាល សារព័ត៌មាន Bild របស់អាល្លឺម៉ង់ បានរាយការណ៍កាលពីថ្ងៃអង្គារថា ប្រធានាធិបតីស៊ីរី លោក Ahmed al-Sharaa ត្រូវបានគេរំពឹងថា នឹងធ្វើទស្សនកិច្ចនៅទីក្រុងប៊ែរឡាំង នាដើមសប្តាហ៍ក្រោយ៕