អ្នកស្រី Francesca Albanese ដែលជាអ្នករាយការណ៍ពិសេសស្តីពីប៉ាឡេស្ទីនរបស់អង្គការសហប្រជាជាតិ(UN) បានចោទប្រកាន់អ៊ីស្រាអែលថា ធ្វើមកលើជនប៉ាឡេស្ទីននៅតំបន់ហ្កាហ្សា ដូចជាសត្វធាតុ បើទោះបីជាពួកគេរងផលប៉ះពាល់យ៉ាងខ្លាំងដោយសារព្យុះរដូវរងា ហើយនិងហេដ្ឋារចនាសម្ព័ន្ធខ្ទេចខ្ទាំក៏ដោយ ។

ថ្លែងប្រាប់កាសែត Al Jazeera កាលពីថ្ងៃអង្គារ ស្របពេលអាកាសធាតុព្យុះវាយប្រហារតំបន់ហ្កាហ្សាស្រ្ទីប ដោយបានសម្លាប់មនុស្ស ៧នាក់ អ្នកស្រី Albanese និយាយថា គ្រោះមហន្តរាយធម្មជាតិ បានលាតត្រដាងយ៉ាងច្បាស់ពីផ្នត់គំនិតមិនអើពើរបស់អ៊ីស្រាអែលចំពោះការរស់រានរបស់ជនស៊ីវិល ។

អ្នកស្រីបន្តថា រឿងដែលធ្វើឲ្យគាត់តក់ស្លុតបំផុត ពេលមើលឃើញគ្រួសារប៉ាឡេស្ទីនអង្គុយក្នុងភក់ ក្នុងស្ថានភាពងងឹត ពេលដែលជំរករបស់ពួកគេបានបាក់នោះ គឺជីវិតរបស់ពួកគេដូចរស់នៅក្នុងឋាននរគ អញ្ចឹងដែរ ។

អ្នកស្រី Albaneseនិយាយទៀតថា ពួកយើងបានឮសំឡេងសមាជិកគ្រួសារស្វែងរកសាច់ញាតិកប់ក្រោមគំនរបាក់បែកអគារ ដោយសារអគារខូចខាតបានបាក់រលំពីលើពួកគេ ដោយសារមានភ្លៀងធ្លាក់ខ្លាំងពេក ។

ស្របពេលព្យុះភ្លៀងគឺជាគ្រោះមហន្តរាយធម្មជាតិ ក្រុមមន្រ្តីមនុស្សធម៌ និយាយជំទាស់ថា ការស្លាប់របស់ពួកគេ គឺជាឆាកល្ខោននយោបាយ ។

លោក James Elder គឺជាអ្នកនាំពាក្យមូលនិធិកុមារអន្តរជាតិ UNICEF នៅតំបន់ហ្កាហ្សា បានបញ្ជាក់ថា ក្មេងៗ ៧នាក់ បានស្លាប់ដោយសារអាកាសធាតុត្រជាក់ ។ 

លោកបានធ្វើការសង្កត់ធ្ងន់ថា ក្មេងៗទាំងនេះ ពិតជាពុំបានស្លាប់ទាំងស្រុងដោយសារសីតុណ្ហភាពត្រជាក់នោះទេ ប៉ុន្តែដោយសារកង្វះខាតស្បៀងអាហារ និងឱសថ ធ្វើឲ្យពួកគេមិនអាចស៊ូទ្រាំនឹងអាកាសធាតុត្រជាក់ខ្លាំងបែបនេះបាន ៕