មន្ត្រីជាន់ខ្ពស់អ៊ីរ៉ង់ម្នាក់ បានប្រាប់សារព័ត៌មាន Reuters នៅថ្ងៃពុធ (ទី១៤ ខែមករា ឆ្នាំ២០២៦) នេះថាទីក្រុងតេអេរ៉ង់ បានព្រមានប្រទេសជិតខាងដែលជាទីតាំងឈរជើងរបស់កងទ័ពអាមេរិកថា ខ្លួននឹងកំណត់គោលដៅលើមូលដ្ឋានទ័ពអាមេរិក ប្រសិនបើទីក្រុងវ៉ាស៊ីនតោនបើកប្រតិបត្តិការវាយប្រហារ ខណៈដែលអ៊ីរ៉ង់ព្យាយាមរារាំងការគំរាមកំហែងរបស់លោក Donald Trump ក្នុងការធ្វើអន្តរាគមន៍ តំណាងឲ្យក្រុមបាតុករ។

អ្នកការទូត ៣នាក់ បាននិយាយថា បុគ្គលិកមួយចំនួនត្រូវបានណែនាំឲ្យចាកចេញពីមូលដ្ឋានទ័ពអាកាសសំខាន់របស់សហរដ្ឋអាមេរិក នៅក្នុងតំបន់ ទោះបីជាមិនមានសញ្ញាភ្លាមៗនៃការជម្លៀសកងទ័ពទ្រង់ទ្រាយធំ ដូចដែលបានកើតឡើងក្នុងរយៈពេលប៉ុន្មានម៉ោង មុនមានការវាយប្រហារដោយមីស៊ីលរបស់អ៊ីរ៉ង់ កាលពីឆ្នាំមុនក៏ដោយ។

លោក Trump បានគំរាមម្តងហើយម្តងទៀតថា នឹងធ្វើអន្តរាគមន៍ ដើម្បីគាំទ្រក្រុមបាតុករ នៅអ៊ីរ៉ង់ ជាកន្លែងដែលក្រុមសិទ្ធិមនុស្ស បានឲ្យដឹងថា មនុស្សយ៉ាងតិច ២.៦០០នាក់ ត្រូវបានសម្លាប់នៅក្នុងការបង្ក្រាបលើការតវ៉ាដ៏ធំបំផុតមួយ ប្រឆាំងនឹងការគ្រប់គ្រងរបស់ក្រុមមេដឹកនាំសាសនា។

មន្ត្រីអ៊ីស្រាអែលម្នាក់បាននិយាយថា បើយោងតាមការវាយតម្លៃរបស់អ៊ីស្រាអែល បានបង្ហាញថា លោក Trump បានសម្រេចធ្វើអន្តរាគមន៍ ទោះបីជាវិសាលភាព និងពេលវេលានៃសកម្មភាពនេះ នៅតែមិនច្បាស់លាស់ក៏ដោយ។ អ្នកការទូតទាំង ៣រូប បានប្រាប់សារព័ត៌មាន Reuters ថា បុគ្គលិកមួយចំនួនត្រូវបានណែនាំឲ្យចាកចេញពីមូលដ្ឋានទ័ពអាកាស Al Udeid របស់យោធាអាមេរិក នៅប្រទេសកាតា នាល្ងាចថ្ងៃពុធនេះ។

ស្ថានទូតអាមេរិកនៅទីក្រុងដូហា មិនមានការអត្ថាធិប្បាយភ្លាមៗអ្វីឡើយ ហើយក្រសួងការបរទេសកាតា ក៏មិនបានឆ្លើយតបភ្លាមៗនោះដែរ ចំពោះសំណើសុំការអត្ថាធិប្បាយ។

សហរដ្ឋអាមេរិកមានកងកម្លាំងនៅទូទាំងតំបន់នេះ រួមទាំងទីស្នាក់ការកណ្តាលប្រតិបត្តិការនៃទីបញ្ជាការកណ្តាល នៅ Al Udeid ក្នុងប្រទេសកាតា និងទីស្នាក់ការកណ្តាលនៃកងនាវាចរទី៥ របស់កងទ័ពជើងទឹកសហរដ្ឋអាមេរិក នៅប្រទេសបារ៉ែន៕