ប្រទេសដាណឺម៉ាកនិយាយថា ខ្លួនលែងប្រកែកទៀតហើយ ជាមួយសហរដ្ឋអាមេរិកលើអនាគតនៃកោះហ្គ្រីនលែន បន្ទាប់ពីកិច្ចប្រជុំជាមួយក្រុមមន្ត្រីជាន់ខ្ពស់នៃសេតវិមាន ប៉ុន្តែបាននិយាយម្តងទៀតថា ការដណ្តើមកាន់កាប់ដែនដីរបស់សហរដ្ឋអាមេរិកគឺ មិនអាចទទួលយកបានទាំងស្រុង។

អនុប្រធានាធិបតីសហរដ្ឋអាមេរិក លោក JD Vance និងរដ្ឋមន្ត្រីការបរទេសលោក Marco Rubio បានជួបជាមួយរដ្ឋមន្ត្រីការបរទេសដាណឺម៉ាក លោក Lars Rasmussen និងរដ្ឋមន្ត្រីការបរទេសហ្គ្រីនលែនលោកស្រី Vivian Motzfeldt នៅទីក្រុងវ៉ាស៊ីនតោន កាលពីថ្ងៃពុធ១៤មករាសប្ដាហ៍នេះ ម៉ោងក្នុងស្រុក។

កិច្ចប្រជុំនេះត្រូវបានបង្កឲ្យមានភាពតានតឹងដោយប្រធានាធិបតី Donald Trump ដែលបានបន្តការអះអាងថា សហរដ្ឋអាមេរិកត្រូវការគ្រប់គ្រងទាំងស្រុងលើកោះនេះ ដើម្បីទប់ទល់នឹងការកាន់កាប់របស់រុស្ស៊ី និងចិន និងបង្ហើបថា លោកអាចដណ្តើមយកដែនដីនេះដោយកម្លាំង។

បន្ទាប់ពីកិច្ចប្រជុំ លោក Trump បានបញ្ជាក់ជាថ្មីទៀតទៅកាន់ក្រុមអ្នកសារព័ត៌មាននៅក្នុងការិយាល័យប្រធានាធិបតីថា កោះហ្គ្រីនលែន មានសារៈសំខាន់ខ្លាំងណាស់សម្រាប់សន្តិសុខជាតិ រួមទាំងប្រទេសដាណឺម៉ាកផងដែរ។

លោក Rasmussen បាននិយាយថា ប្រទេសដាណឺម៉ាកបានចែករំលែកការព្រួយបារម្ភរបស់លោក Trump ថា មានបរិយាកាសសន្តិសុខដែលកំពុងផ្លាស់ប្តូរនៅក្នុងតំបន់អាកទិក ហើយចង់ធ្វើការជាមួយសហរដ្ឋអាមេរិក ដើម្បីទប់ទល់នឹងការគំរាមកំហែង។

លោកថាការខ្វែងគំនិតគ្នាដ៏ធំគឺថាតើនោះត្រូវតែនាំទៅរកស្ថានភាពដែលសហរដ្ឋអាមេរិកទទួលបានកោះហ្គ្រីនលែនឬអត់ ហើយនោះពិតជាមិនចាំបាច់ទាល់តែសោះ៕